لاہور: وزیراعلیٰ پنجاب مریم نواز نے لاہور میں سال 2027 کی بسنت کی تاریخوں کا اعلان کردیا ہے۔ اعلان کے مطابق بسنت 2027 آئندہ سال 12، 13 اور 14 مارچ کو منائی جائے گی۔
وزیراعلیٰ پنجاب مریم نواز کا کہنا ہے کہ بسنت 2026 کے کامیاب انعقاد کے بعد لاہور ایک بار پھر رنگوں، ثقافت، موسیقی، جوش و جذبے اور روایتی مہمان نوازی سے جگمگائے گا۔
مریم نواز نے کہا کہ بسنت لاہور کی ثقافتی پہچان کا اہم حصہ ہے اور حکومت کی کوشش ہے کہ اس تہوار کو منظم، محفوظ اور بھرپور انداز میں منایا جائے تاکہ شہریوں کے ساتھ ساتھ ملک بھر سے آنے والے مہمان بھی اس جشن سے لطف اندوز ہوسکیں۔
وزیراعلیٰ پنجاب نے نوجوانوں کو بسنت 2027 میں بھرپور شرکت کی دعوت دیتے ہوئے کہا کہ یہ جشن نوجوانوں کے لیے ہے، سب مل کر یادگار لمحات بنائیں اور لاہور کو اپنی توانائی، خوشی اور جذبے سے روشن کریں۔
انہوں نے بیرون ملک مقیم پاکستانیوں اور عالمی مہمانوں کو بھی دعوت دی کہ وہ بسنت 2027 کی تاریخیں محفوظ کرلیں اور لاہور کے رنگوں، گرمجوشی اور ثقافتی تہوار کا حصہ بننے کے لیے پاکستان آئیں۔
مریم نواز کا کہنا تھا کہ ان شاء اللہ سب مل کر بسنت 2027 کو ایک اور بڑی کامیابی اور یادگار جشن بنائیں گے۔
بسنت کے اعلان کے بعد شہریوں، نوجوانوں اور ثقافتی حلقوں میں خوشی کی لہر دوڑ گئی ہے جبکہ لاہور میں آئندہ سال مارچ کے دوران سیاحت، ثقافتی سرگرمیوں اور عوامی تقریبات میں اضافے کی توقع کی جا رہی ہے۔
