راولپنڈی میں بسنت کے دوران ہوائی فائرنگ اور قاتل ڈور سے زخمیوں کی تعداد 50 ہوگی جبکہ ایک 65 سالہ شخص پتنگ اڑاتے ہوئے چھت سے گرنے کے باعث جاں بحق ہوگیا۔
حکومت کی جانب سے پابندی کے باوجود راولپنڈی میں منائی جانے والی بسنت میں عوام نے پولیس کو تگنی کا ناچ نچائے رکھا۔ پولیس اور پتنگ بازوں کے درمیان شروع ہونے والی آنکھ مچولی رات گئے تک جاری رہی، ہوائی فائرنگ،پتنگ لوٹنے، چھتیں پھلانگنے اور گلے پر ڈور پھرنے سے مجموعی طور پر50سے زائد افراد زخمی ہو گئے۔
پتنگ بازی کے دوران زخمی ہونے والوں کو ان کے ورثا پولیس کے خوف سے پرائیویٹ اسپتالوں میں لے جاتے رہے۔ دوسری جانب پولیس نے کارروائی کرتے ہوئے 300کے قریب پتنگ بازوں کو گرفتار کر کے 24 افراد سے اسلحہ برآمد کرنے کا بھی دعویٰ کیا ہے۔
ادھر بے نظیر اسپتال کی ایمرجنسی میں زخمیوں کے رش کے باعث عام افراد کا داخلہ بند کر دیا گیا اس موقع پر راولپنڈی پولیس بسنت کنٹرول کرنے میں مکمل ناکام نظر آئی تاہم کیمیکل اور دھاتی ڈور کے نقصانات سے بچانے کے لیے پولیس نے تمام فلائی اوورز پر موٹرسائیکلوں کا داخلہ بند کردیا۔
