لاہور: پاکستان کے سابق آل راؤنڈر اظہر محمود نے قومی ٹیم کے سابق کپتان بابر اعظم کے حق میں کھل کر آواز بلند کرتے ہوئے کہا ہے کہ پاکستان میں اس وقت ایک ہی بڑا سپر اسٹار موجود ہے، لیکن بدقسمتی سے ہم اسے وہ عزت نہیں دیتے جس کا وہ حقدار ہے۔
غیر ملکی میڈیا سے گفتگو کرتے ہوئے اظہر محمود نے کہا کہ بابر اعظم کو گزشتہ کچھ عرصے کے دوران سابق کھلاڑیوں، کرکٹ تجزیہ کاروں اور سوشل میڈیا صارفین کی جانب سے مسلسل تنقید کا سامنا کرنا پڑا، جس کا ان پر ذہنی طور پر کافی اثر ہوا۔
اظہر محمود کے مطابق بابر اعظم ایک شرمیلے مزاج کے انسان ہیں، اس لیے وہ اکثر تنقید کا جواب دینے کے بجائے خاموش رہنے کو ترجیح دیتے ہیں۔ انہوں نے کہا کہ انگلینڈ کے خلاف آخری سیریز کے بعد جب بابر ٹیم سے باہر تھے تو انہیں تقریباً پانچ ماہ تک قریب سے دیکھنے کا موقع ملا۔
سابق آل راؤنڈر کا کہنا تھا کہ اس دوران بابر اعظم سابق کرکٹرز اور سوشل میڈیا پر ہونے والی تنقید سے کافی دل برداشتہ دکھائی دیے۔ اظہر محمود نے کہا کہ بابر میں خامیاں ضرور ہوسکتی ہیں اور ان کے کھیل میں بہتری کی گنجائش بھی موجود ہے، لیکن وقت کے ساتھ وہ پہلے سے زیادہ پختہ اور سمجھدار ہوئے ہیں۔
اظہر محمود نے مزید کہا کہ جب بابر اعظم کپتان ہوتے ہیں تو وہ زیادہ پراعتماد نظر آتے ہیں، تاہم قیادت سے الگ ہونے کے بعد بعض اوقات غیر ضروری تنقید کے باعث وہ خود کو محدود کر لیتے ہیں۔
بابر اعظم نے پاکستان کی قیادت کرتے ہوئے 150 میچز میں مجموعی طور پر 56.67 فیصد فتوحات حاصل کیں۔ ان کی کپتانی میں پاکستان ٹی ٹوئنٹی ورلڈ کپ کے سیمی فائنل اور اگلے ایڈیشن کے فائنل تک پہنچا جبکہ ون ڈے کرکٹ میں بھی ان کا جیت کا تناسب 60 فیصد سے زائد رہا۔
کرکٹ حلقوں کے مطابق بابر اعظم کا شمار پاکستان کے کامیاب ترین بلے بازوں میں ہوتا ہے، تاہم حالیہ عرصے میں فارم اور کپتانی سے متعلق بحث کے باعث وہ مسلسل خبروں میں رہے ہیں۔
