اسلام آباد: پاکستانی پیشہ ور افراد کے لیے بیرونِ ملک ملازمتوں کے اہم مواقع سامنے آگئے ہیں۔ بیورو آف امیگریشن اینڈ اوورسیز ایمپلائمنٹ نے اقوام متحدہ کے ذیلی ادارے یونسکو میں پاکستانی شہریوں کے لیے عالمی سطح پر نوکریوں اور بین الاقوامی کیریئر کے مواقع سے متعلق تفصیلات جاری کردی ہیں۔
بیورو آف امیگریشن کے مطابق یونسکو میں مختلف شعبوں سے تعلق رکھنے والے پاکستانی امیدواروں کے لیے P-1 سے P-5 تک جبکہ ڈائریکٹر سطح کی D-1 اور D-2 پوزیشنز پر مواقع دستیاب ہیں۔ ان ملازمتوں کا مقصد پاکستانی ماہرین اور باصلاحیت افراد کو عالمی اداروں میں اپنی خدمات پیش کرنے کا موقع فراہم کرنا ہے۔
کن شعبوں میں ملازمت کے مواقع دستیاب ہیں؟
یونسکو کی جانب سے تعلیم، سائنس، ثقافت، انتظامیہ، فنانس، انجینئرنگ اور سماجی و انتظامی علوم سے تعلق رکھنے والے امیدواروں کے لیے مختلف آسامیوں کا اعلان کیا گیا ہے۔
ان شعبوں سے وابستہ پاکستانی پیشہ ور افراد اپنی اہلیت، تجربے اور تعلیمی قابلیت کے مطابق یونسکو کے کیریئر پورٹل کے ذریعے درخواست دے سکتے ہیں۔
اہلیت اور ضروری مہارتیں
درخواست دینے والے امیدواروں کے پاس متعلقہ شعبے میں یونیورسٹی ڈگری، پیشہ ورانہ سند اور عملی تجربہ ہونا ضروری ہے۔ اس کے علاوہ بہترین کمیونیکیشن اسکلز رکھنے والے امیدواروں کو ترجیح دی جائے گی۔
یونسکو کی بین الاقوامی نوعیت کے باعث انگریزی زبان پر عبور ضروری ہے جبکہ فرانسیسی زبان جاننے والے امیدواروں کے لیے اضافی فائدہ ہوسکتا ہے۔
تنخواہ اور مراعات
منتخب ہونے والے امیدواروں کو عالمی سطح کے منصوبوں پر کام کرنے کا موقع ملے گا۔ بنیادی تنخواہ کے ساتھ یونسکو کے قواعد کے مطابق فیملی الاؤنس، بچوں کی تعلیم کے لیے مالی معاونت، سفری الاؤنسز اور دیگر سہولیات بھی فراہم کی جاسکتی ہیں۔
درخواست کیسے دی جائے؟
خواہش مند امیدوار یونسکو کے آفیشل کیریئر پورٹل careers.unesco.org پر جا کر دستیاب آسامیوں کی تفصیلات دیکھ سکتے ہیں اور اپنی درخواست آن لائن جمع کرا سکتے ہیں۔
درخواست کے بعد امیدواروں کو تکنیکی جانچ، تحریری ٹیسٹ اور انٹرویو کے مراحل سے گزرنا ہوگا۔
بیورو آف امیگریشن نے امیدواروں کو ہدایت کی ہے کہ وہ کسی غیر رسمی ایجنٹ، غیر تصدیق شدہ ویب سائٹ یا تھرڈ پارٹی پورٹل پر بھروسہ نہ کریں۔ تمام آسامیوں کی تصدیق صرف یونسکو کی آفیشل ویب سائٹ سے کی جائے۔
امیدواروں کو مشورہ دیا گیا ہے کہ وہ آخری تاریخ سے پہلے اپنی مکمل دستاویزات، سی وی اور کور لیٹر آن لائن اپ لوڈ کریں تاکہ درخواست کے عمل میں کسی قسم کی رکاوٹ پیش نہ آئے۔
