پشاور (شوبز رپورٹر) سینئر فنکار احمد سجاد نے کہا ہے کہ فنکاروں کے جائز حقوق کو مزید نظر انداز نہ کیا جائے کیونکہ جہاں فنکار ہوگا وہاں امن ہوگا۔ انہوں نے یہ بات پشاور پریس کلب میں پریس کانفرنس سے خطاب کرتے ہوئے کہی۔
احمد سجاد کا کہنا تھا کہ سابق وزرائے اعلیٰ پرویز خٹک اور سردار مہتاب احمد خان نے اپنے ادوار میں فنکاروں کی فلاح و بہبود کے لیے جو اعلانات کیے تھے وہ تاحال پورے نہیں کیے گئے۔ انہوں نے سوال اٹھایا کہ وہ پچاس کروڑ روپے کا بینیوولنٹ فنڈ کہاں گیا جس کا اعلان کیا گیا تھا۔
انہوں نے افسوس کا اظہار کرتے ہوئے کہا کہ نشتر ہال، ریڈیو پشاور، اسٹیج اور سرکاری ٹی وی کے دروازے فنکاروں پر بند کیے جا رہے ہیں، جس کے باعث فنکار معاشی مشکلات کا شکار ہو کر فن و ثقافت کو خیرباد کہنے پر مجبور ہیں۔
پریس کانفرنس کے موقع پر سماجی رہنما زبیر الٰہی، نامور فنکارہ عفت صدیقی اور دیگر فنکار بھی موجود تھے، جنہوں نے فنکار برادری کے مسائل کے حل اور سرکاری سرپرستی کی بحالی کا مطالبہ کیا۔
