وزیر اعظم شہباز شریف کے اعلان کردہ 160 ارب روپے کے خیبرپختونخوا ترقیاتی پیکج کے تحت ابتدائی مرحلے میں 10 ارب روپے کے فنڈز صوبائی حکومت کے حوالے کر دیے گئے ہیں ۔
اسلام آباد: متعلقہ دستاویزات کے مطابق صوبے کے 12 منتخب اضلاع کی تعمیر و ترقی کے لیے 96 ارب 97 کروڑ 10 لاکھ روپے کا بجٹ مقرر کیا گیا ہے، جبکہ دیگر 25 اضلاع کے لیے 63 ارب 20 کروڑ 60 لاکھ روپے مختص کرنے کی سفارش کی گئی ہے ۔
رپورٹ کے مطابق ان 12 اضلاع میں مجموعی طور پر 430 ترقیاتی منصوبوں پر کام کا آغاز ہوگا، ان میں سے 7 اہم ترین منصوبوں پر 19 ارب 27 کروڑ روپے خرچ ہوں گے، جبکہ بقیہ 423 سکیموں کے لیے 77 ارب 70 کروڑ 10 لاکھ روپے کی رقم تجویز کی گئی ہے، اس کے ساتھ ہی ان علاقوں میں 100 روزہ اور 180 روزہ قلیل مدتی ترقیاتی پروگرام بھی متعارف کرائے جائیں گے ۔
اس ترقیاتی فنڈ میں سے امن و امان کے قیام سے متعلق 62 منصوبوں پر 39 ارب 19 کروڑ روپے کی لاگت آئے گی، جس کے ذریعے پولیس اور قانون نافذ کرنے والے دیگر اداروں کی استعدادِ کار بڑھانے پر خصوصی توجہ دی جائے گی ۔
دستاویزات میں مزید کہا گیا ہے کہ صحت کے شعبے میں 41 منصوبوں کے لیے 3 ارب 20 کروڑ روپے رکھے گئے ہیں۔ دوسری جانب ان مخصوص اضلاع میں فروغِ تعلیم کے 72 منصوبوں پر 12 ارب 90 کروڑ روپے خرچ کیے جائیں گے، جن میں باجوڑ، کرم اور ڈیرہ اسماعیل خان میں تین دانش سکولوں کا قیام، 70 سکولوں کی مرمت و اپ گریڈیشن اور 409 تعلیمی اداروں کی شمسی توانائی پر منتقلی شامل ہے ۔
علاقے میں مواصلات اور سڑکوں کے انفراسٹرکچر کی بہتری کے 32 منصوبوں کے لیے 12 ارب 70 کروڑ روپے مختص کیے گئے ہیں، جن میں ٹل پاراچنار روڈ اور گومل زام ڈیم جیسے بڑے منصوبے بھی شامل ہیں ۔
شہریوں کو صاف پانی کی بلاتعطل فراہمی کے لیے 88 واٹر سپلائی سکیموں کو سولر انرجی پر منتقل کیا جائے گا۔ زرعی ترقی کے لیے بھی خصوصی اقدامات تجویز کیے گئے ہیں، جن کی بدولت 100 طلبہ کو زرعی شعبے میں اعلیٰ تعلیم کے لیے سکالرشپ پر چین بھیجا جائے گا ۔
مزید برآں دستاویزات کے مطابق خیبرپختونخوا کے باقی 25 اضلاع میں بھی کل 219 ترقیاتی سکیمیں پایہ تکمیل تک پہنچائی جائیں گی ۔


