سوشل ایکٹوسٹ اور ماہرِ نفسیات ڈاکٹر نبیحہ علی خان نے اپنے شوہر حارث کھوکھر سے خلع لینے کے لیے فیملی کورٹ میں درخواست دائر کر دی ہے۔
دائر درخواست کے مطابق ڈاکٹر نبیحہ علی نے اپنے وکیل چوہدری مدثر ایڈووکیٹ کے توسط سے عدالت سے رجوع کیا۔ درخواست میں انہوں نے اپنے شوہر کے رویے اور کردار سے متعلق سنگین الزامات عائد کیے ہیں۔
ڈاکٹر نبیحہ علی نے عدالت کے روبرو مؤقف اختیار کیا کہ ان کے شوہر مبینہ طور پر انہیں گالیاں دیتے اور تشدد کا نشانہ بناتے تھے۔ ان کے مطابق شوہر کا رویہ ان کے ساتھ انتہائی نامناسب تھا، جس کے باعث وہ مزید ازدواجی زندگی جاری نہیں رکھنا چاہتیں۔
درخواست گزار نے فیملی کورٹ سے استدعا کی ہے کہ ان کے حق میں خلع کی ڈگری جاری کرنے کا حکم دیا جائے۔
واضح رہے کہ درخواست میں عائد کیے گئے الزامات ڈاکٹر نبیحہ علی کے عدالتی مؤقف پر مبنی ہیں۔ اس حوالے سے ان کے شوہر کا مؤقف تاحال سامنے نہیں آیا۔
