اسلام آباد:وفاقی وزیرِ توانائی سردار اویس احمد خان لغاری نے تاجکستان کے وزیرِ توانائی و آبی وسائل دالر جمعہ سے ورچوئل ملاقات کی، جس میں دوطرفہ توانائی تعاون، علاقائی پاور کنیکٹیویٹی اور جاری منصوبوں میں پیش رفت پر تفصیلی تبادلہ خیال کیا گیا۔
ملاقات کے دوران دونوں رہنماؤں نے پاکستان اور تاجکستان کے درمیان توانائی کے شعبے میں تعاون کو مزید وسعت دینے پر اتفاق کیا ۔ وفاقی وزیر نے کہا کہ علاقائی پاور کنیکٹیویٹی خطے کے توانائی مستقبل کے لیے ناگزیر ہے اور اس ضمن میں مشترکہ کوششیں توانائی سلامتی اور معاشی استحکام کے حصول میں کلیدی کردار ادا کر سکتی ہیں۔
سردار اویس لغاری نے کہا کہ پاکستان تاجکستان کے ساتھ توانائی منصوبوں میں طویل المدتی شراکت داری کا خواہاں ہے اور پائیدار و قابلِ اعتماد توانائی حل کے فروغ کے لیے عملی اقدامات جاری رکھے گا۔ انہوں نے بالخصوص CASA-1000 منصوبے میں پیش رفت پر تبادلہ خیال کرتے ہوئے اس کی بروقت تکمیل کی اہمیت اجاگر کی۔
دونوں وزراء نے توانائی کے شعبے میں تکنیکی سطح پر باقاعدہ رابطوں اور تعاون کو مزید مؤثر بنانے پر بھی اتفاق کیا تاکہ جاری اور مستقبل کے منصوبوں پر پیش رفت کو یقینی بنایا جا سکے۔
