فیصل آباد: فیصل آباد میں ٹریفک وارڈن کے چلتی گاڑی پر لٹکنے کی ویڈیو سوشل میڈیا پر وائرل ہوگئی۔
رپورٹ کے مطابق واقعہ فیصل آباد کے کینال روڈ پر پیش آیا۔ ٹریفک وارڈن انعام الحق نے ایک ڈرائیور کو رکنے کا اشارہ کیا۔ تاہم ڈرائیور نے گاڑی روکنے کے بجائے آگے بڑھا دی۔
ڈرائیور کے گاڑی بھگانے پر ٹریفک وارڈن نے گاڑی کا دروازہ کھولا اور چلتی گاڑی کے ساتھ لٹک گیا۔ ویڈیو میں دیکھا جا سکتا ہے کہ گاڑی سڑک پر چل رہی ہے جبکہ وارڈن دروازے کے ساتھ لٹکا ہوا ہے۔
اس دوران ٹریفک وارڈن کی وردی بھی پھٹ گئی۔ رپورٹ کے مطابق وارڈن کافی دور تک گاڑی کے ساتھ لٹکا رہا۔
بعد ازاں ٹریفک حکام نے چالان ادا کرنے اور ڈرائیور کی معافی کے بعد گاڑی کو چھوڑ دیا۔
واقعے کی ویڈیو سوشل میڈیا پر تیزی سے شیئر کی جا رہی ہے۔ شہریوں کی جانب سے واقعے پر مختلف ردعمل سامنے آ رہا ہے۔
