راولپنڈی: فیلڈ مارشل سید عاصم منیر سے لیبیا کی عرب مسلح افواج کے نائب کمانڈر انچیف لیفٹیننٹ جنرل صدام خلیفہ نے ملاقات کی ہے۔
پاک فوج کے شعبہ تعلقات عامہ آئی ایس پی آر کے مطابق یہ ملاقات جنرل ہیڈ کوارٹرز راولپنڈی میں ہوئی۔ جی ایچ کیو آمد پر معزز مہمان کو پاکستان کی تینوں مسلح افواج کے چاق و چوبند دستے نے گارڈ آف آنر پیش کیا۔
ملاقات میں باہمی دلچسپی کے امور، علاقائی سلامتی کی صورتحال اور دفاعی تعاون پر تبادلہ خیال کیا گیا۔ اس دوران دونوں ممالک کی افواج کے درمیان عسکری روابط کو مزید فروغ دینے کے امکانات کا بھی جائزہ لیا گیا۔
دونوں جانب سے پاکستان اور لیبیا کے دفاعی تعلقات کو مزید مضبوط بنانے پر زور دیا گیا۔ ملاقات میں پیشہ ورانہ عسکری تربیت اور سلامتی کے شعبوں میں تعاون بڑھانے کی اہمیت پر بھی بات کی گئی۔
فیلڈ مارشل سید عاصم منیر نے کہا کہ پاکستان فوج دوست ممالک کے ساتھ امن، استحکام اور تعمیری تعاون کے فروغ کے لیے پرعزم ہے۔
اس موقع پر لیفٹیننٹ جنرل صدام خلیفہ نے پاکستان کی مسلح افواج کی پیشہ ورانہ صلاحیتوں کو سراہا۔ انہوں نے خطے میں امن و سلامتی کے قیام کے لیے پاکستان کی مسلح افواج کی خدمات کو بھی خراجِ تحسین پیش کیا۔
ملاقات کو پاکستان اور لیبیا کے درمیان دفاعی تعاون کو مزید مضبوط بنانے کے لیے اہم پیش رفت قرار دیا جا رہا ہے۔
