پشاور (شوبز ڈیسک) — معروف گلوکارہ طاہرہ سید نے سوشل میڈیا پر اپنی وفات سے متعلق گردش کرنے والی جھوٹی خبروں کی سختی سے تردید کرتے ہوئے کہا ہے کہ وہ بفضلِ خدا بالکل صحت مند اور بحیات ہیں۔
انہوں نے کہا کہ ان کی موت سے متعلق پھیلائی جانے والی خبریں بے بنیاد اور افسوسناک ہیں۔ طاہرہ سید نے اپنے پیغام میں کہا کہ ہر انسان کو بالآخر موت کا ذائقہ چکھنا ہے اور زندگی ایک عارضی حقیقت ہے، تاہم اس طرح کی من گھڑت اور غلط خبریں پھیلانا انتہائی غیر ذمہ دارانہ عمل ہے۔
گلوکارہ نے عوام سے اپیل کی کہ وہ غیر مصدقہ اور جھوٹی خبروں پر یقین کرنے کے بجائے تصدیق شدہ معلومات پر اعتماد کریں اور ایسی افواہوں کو پھیلانے سے گریز کریں۔
