ضلع لوئر دیر کے پہاڑی علاقے دانوہ کے پہاڑی سلسلوں میں لگی آگ پر مکمل طور پر قابو پالیا گیا ہے۔ ریسکیو ذرائع کے مطابق آگ بجھانے کے آپریشن میں متعدد اداروں اور مقامی افراد نے مشترکہ طور پر حصہ لیا۔
ریسکیو 1122، محکمہ جنگلات، دیر لیویز، سول ڈیفنس، الخدمت فاؤنڈیشن اور مقامی رضاکاروں نے مسلسل کوششوں کے بعد آگ پر قابو پایا اور مزید پھیلاؤ کو روک دیا۔
آپریشن کے دوران ڈپٹی کمشنر لوئر دیر بشارت احمد، ایڈیشنل ڈپٹی کمشنر ریلیف و انسانی حقوق سید اکرم شاہ، ڈسٹرکٹ ایمرجنسی آفیسر ثناء اللہ اور ڈسٹرکٹ فارسٹ آفیسر شبیر احمد موقع پر موجود رہے اور امدادی سرگرمیوں کی نگرانی کرتے رہے۔
ریسکیو حکام کے مطابق متاثرہ علاقے میں سڑکوں کی عدم موجودگی اور دشوار گزار پہاڑی راستوں کے باعث فائر وہیکلز کا جائے وقوعہ تک پہنچنا ممکن نہیں تھا، جس کے باوجود امدادی ٹیموں نے پیدل رسائی حاصل کرکے آگ بجھانے کا عمل کامیابی سے مکمل کیا۔
حکام کا کہنا ہے کہ آگ لگنے کی وجوہات کا تعین کیا جا رہا ہے جبکہ متاثرہ جنگلاتی علاقے کا جائزہ بھی لیا جا رہا ہے۔
