لاہور: وزیر اطلاعات و ثقافت پنجاب عظمیٰ بخاری نے کہا ہے کہ وزیراعلیٰ مریم نواز شریف کی قیادت میں پنجاب کے شعبہ صحت کو عالمی معیار سے ہم آہنگ کیا جا رہا ہے۔
صوبائی وزیر کا کہنا ہے کہ صحت کے شعبے میں چینی تجربات اور مہارت سے استفادہ کیا جائے گا۔
انہوں نے کہا کہ ووہان یونیورسٹی، تائی پنگ ہیلتھ اور دیگر چینی اداروں نے پنجاب میں ہیلتھ انشورنس کے شعبے میں تعاون پر اتفاق کیا ہے۔
چینی ہیلتھ انشورنس کمپنیوں کے تعاون سے پنجاب کے ہیلتھ انشورنس سیکٹر میں مزید بہتری آئے گی۔
عظمیٰ بخاری نے کہا کہ پروفیسر چن کی سربراہی میں چینی ہیلتھ انشورنس وفد نے پنجاب کے ہیلتھ سیکٹر میں دلچسپی کا اظہار کیا ہے۔
پنجاب کے شعبہ صحت میں بین الاقوامی سرمایہ کاری اور جدید انشورنس ماڈلز کا فروغ خوش آئند ہے۔
انہوں نے بتایا کہ چین پاکستان مشترکہ نیورو سرجری تربیتی و طبی سیاحت مرکز ووہان میں قائم کیا گیا ہے۔
یہ مرکز طبی تربیت، تحقیق اور علمی تبادلے کو فروغ دے گا۔
اس مرکز کے ذریعے پاکستانی ڈاکٹرز کی تربیت کے مواقع بھی بڑھیں گے۔
اس تعاون کے شراکت داروں میں پنجاب انسٹی ٹیوٹ آف نیورو سائنسز، ژونگ نان ہسپتال ووہان اور سی پی ایم اے شامل ہیں۔
وزیر اطلاعات نے کہا کہ چینی اور پاکستانی ماہرین کے درمیان طبی مہارت اور جدید علاج کے تبادلے کو فروغ دیا جا رہا ہے۔
چین اور پنجاب میں مشترکہ تحقیق اور جدید طبی ٹیکنالوجی کے فروغ کی کوششیں بھی جاری ہیں۔
عظمیٰ بخاری کے مطابق پنجاب ہیلتھ کنیکٹ پروگرام کے ذریعے عالمی طبی ماہرین کو پنجاب کے اداروں سے جوڑا جا رہا ہے۔
پروگرام کے تحت پاکستانی ڈاکٹرز کی تربیت اور طبی مہارت کے تبادلے پر توجہ دی جا رہی ہے۔
انہوں نے کہا کہ چین سے پنجاب کو جدید طبی ٹیکنالوجی کے ساتھ ساتھ مہارت اور انسانی وسائل کی تربیت بھی منتقل ہو رہی ہے۔
اس عمل سے صوبے کے صحت کے شعبے میں جدید سہولیات اور خدمات کے فروغ میں مدد ملے گی۔
