اسلام آباد: وزیراعظم محمد شہباز شریف نے ہندوؤں کے مذہبی تہوار ہولی کے موقع پر پاکستان کی ہندو کمیونٹی کو دلی مبارکباد اور نیک تمناؤں کا اظہار کیا ہے۔
وزیراعظم نے اپنے پیغام میں کہا کہ ہولی کا تہوار خوش نما رنگوں کے امتزاج سے معاشرتی ہم آہنگی کی عکاسی کرتا ہے اور اس کی روایات پاکستان کی ثقافتی تنوع کا مظہر ہیں۔ انہوں نے کہا کہ ہندو کمیونٹی ہمارے معاشرے کا ایک بیش قدر حصہ ہے، جس کا ملکی سماجی ہم آہنگی، معاشی ترقی و خوشحالی اور پُرامن بقائے باہمی میں مثبت کردار ہے۔
انہوں نے کہا کہ آئینِ پاکستان بلا تفریق رنگ و نسل، مذہب و عقیدہ تمام شہریوں کے لیے مذہبی آزادی اور انسانی حقوق کا تحفظ کرتا ہے۔ حکومتِ پاکستان تمام اقلیتوں کے آئینی حقوق کی محافظ ہے۔
وزیراعظم نے مزید کہا کہ اس تناظر میں حکومتی اقدامات میں پالیسی برائے بین المذاہب ہم آہنگی 2025 اور حکمت عملی برائے مذہبی برداشت 2025 شامل ہیں۔ انہوں نے زور دیا کہ بین المذاہب مکالمہ، عبادت گاہوں کی حفاظت اور باہمی احترام کی سماجی روش کے فروغ کے لیے من حیث القوم کام کرنے کی ضرورت ہے۔
وزیراعظم نے اپنے پیغام کے اختتام پر کہا کہ آئیے آج قومی عزم کی تجدید کریں کہ ہم رواداری، ہمدردی اور یکجہتی کی اقدار کے ساتھ پُرامن، شمولیتی اور خوشحال مستقبل کے لیے مشترکہ کاوشیں جاری رکھیں گے۔
