اسرائیلی میڈیا نے دعویٰ کیا ہے کہ ایران کے سپریم لیڈر آیت اللہ علی خامنہ ای کے صاحبزادے مجتبیٰ خامنہ ای کو ایران کا نیا سپریم لیڈر منتخب کر لیا گیا ہے اور ان کی تقرری کا باقاعدہ اعلان آئندہ چند گھنٹوں میں متوقع ہے۔
رپورٹس کے مطابق سپریم لیڈر کے انتخاب کے لیے مجلس خبرگان رهبری کا اہم اجلاس منعقد ہوا، جس میں بیشتر اراکین نے ویڈیو لنک کے ذریعے شرکت کی۔ اسرائیلی میڈیا کا کہنا ہے کہ اجلاس میں نئے سپریم لیڈر کے نام پر اتفاقِ رائے ہو چکا ہے۔
دوسری جانب ایرانی میڈیا نے ان دعوؤں کی تصدیق نہیں کی۔ ایرانی ذرائع کے مطابق مجلس خبرگان رہبری کا اجلاس تاحال جاری ہے اور نئے سپریم لیڈر کے تقرر کے عمل میں ایک ہفتے تک کا وقت لگ سکتا ہے۔
ابھی تک ایران کی جانب سے کسی حتمی فیصلے یا نام کا سرکاری اعلان سامنے نہیں آیا، جس کے باعث صورتحال غیر یقینی کا شکار ہے اور عالمی سطح پر اس پیش رفت پر گہری نظر رکھی جا رہی ہے۔
