آزاد کشمیر میں قانون ساز اسمبلی کے الیکشن کے پہلے مرحلے کے دوران میرپور ڈویژن میں پولنگ کا عمل ایک گھنٹے تک بڑھا دیا گیا، جو شام 6 بجے تک جاری رہا، ڈویژن بھر مجموعی طور پر ووٹنگ کا عمل پرامن طریقے سے مکمل ہوا تاہم بھمبر میں ایک پولنگ سٹیشن پر ہنگامہ آرائی ہوئی ۔
بھمبر: آزاد کشمیر کے علاقے بھمبر میں دربار بابا شادی شہید کے پولنگ سٹیشن پر ہنگامہ آرائی کے دوران شرپسندوں نے پولنگ باکس چھین کر اسے آگ لگا دی، ڈی آر او کے مطابق جس بیلٹ باکس کو آگ لگائی گئی اس میں 232 ووٹ تھے ۔
بابا شادی شہید کے ایک پولنگ سٹیشن کے علاوہ تمام پولنگ سٹیشن پر صورتحال معمول کے مطابق رہی، دربار بابا شادی شہید پولنگ سٹیشن پر دوبارہ پولنگ ہوگی یا نہیں فیصلہ بعد میں کیا جائے گا ۔
میر پور ڈویژن کے 13 حلقوں میں ووٹنگ ہوئی جہاں میرپور ضلع کی 4، بھمبر کی 3 اور کوٹلی کی 6 نشستوں پر ووٹنگ ہوئی، 13 حلقوں میں 288 امیدواروں کے درمیان مقابلہ ہے ۔
مسلم لیگ ن اور پیپلز پارٹی کے امیدواروں میں کانٹے دار مقابلے کی توقع کی جا رہی ہے، اس کے علاوہ آئی پی پی اور آزاد امیدوار بھی میدان میں ہیں ۔
میرپور ڈویژن میں مجموعی طور پر 14 لاکھ 437 ووٹر رجسٹرڈ، جن میں سے 7 لاکھ 24 ہزار 811 مرد اور 6 لاکھ 75 ہزار 626 خواتین ووٹرز شامل ہی ں۔
الیکشن کی سکیورٹی کیلئے میرپور ڈویژن میں 18 ہزار 560 اہلکار تعینات ہیں، پاک فوج کے 2100 جوان بھی الیکشن کی سکیورٹی پر مامور ہیں، انتخابات کے لیے سکیورٹی کے فول پروف انتظامات بھی کیے گئے ہیں ۔
چیف الیکشن کمشنر آزاد کشمیرجسٹس (ریٹائرڈ غلام) مصطفیٰ مغل کا کہنا ہے کہ ووٹنگ کے عمل میں رکاوٹ ڈالنے والوں کے خلاف قانونی کارروائی ہوگی۔
چیف سیکرٹری آزاد جموں و کشمیر خوشحال خان نے کہا کہ آزاد کشمیر کے عوام نے انتشاری ٹولوں کو مسترد کرکے جمہوری عمل پر اعتماد کا اظہار کیا ہے، پُرامن انتخابات کے لیے تمام ریاستی ادارے تیار ہیں، انتخابی عمل میں رکاوٹ ڈالنے یا امن خراب کرنے والوں کے خلاف قانون حرکت میں آئے گا ۔
دوسری جانب الیکشن کمیشن آزاد کشمیر نے مبینہ دھاندلی کے الزامات سامنے آنے پر 2 پریزائیڈنگ افسران کے خلاف ایکشن لیتے ہوئے انہیں معطل کر دیا ۔
ترجمان الیکشن کمیشن آزاد کشمیر کے مطابق 2 پریزائیڈنگ افسران پولنگ سٹیشن کے بجائے نجی رہائش گاہ چلے گئے تھے، جس پر ریٹرننگ افسر نے پولنگ بیگز فوری تحویل میں لے لیے، ان کی جگہ نئے پریزائیڈنگ افسران تعینات کر کے، انہیں پولنگ سٹیشنز کی جانب روانہ کر دیا گیا ہے ۔
ترجمان نے بتایا کہ گرفتار پریزائیڈنگ افسران کیخلاف انتخابی قوانین کے تحت کارروائی جاری ہے، انتخابی عمل میں غفلت یا بے ضابطگی برداشت نہیں کی جائے گی، شفاف، غیر جانبدار انتخابات کے انعقاد کیلئے ہر ممکن اقدام جاری ہے ۔
