اسٹیٹ بینک آف پاکستان نے نئے کرنسی نوٹوں کی سیریز سے متعلق اہم وضاحت جاری کر دی ہے۔ وفاقی حکومت کی منظوری کے بعد ہی نئے ڈیزائن کے نوٹوں کی سیریز کی چھپائی شروع ہوگی۔
ذرائع کے مطابق ، اسٹیٹ بینک کے مطابق ،جنوری میں آرٹ مقابلے کے ساتھ نئے کرنسی نوٹوں کی سیریز کی ڈیزائننگ کا عمل شروع کیاگیا تھا ـ مقابلے کا مقصد فنکاروں کی حوصلہ افزائی کرنا تھا اور بین الاقوامی سطح پر بہترین ڈیزائن کی تیاری میں عوام کو شامل کرنا تھا۔
مزید یہ بتایا گیا کہ ڈیزائنز کا جائزہ ماہرین پر مشتمل کمیٹی نے لیا ـ فاتح انٹریز کا اعلان 5 ستمبر کو کیا گیا تھا ـ مقابلے کے نتائج کو بعض حلقوں نے نئے نوٹوں کی سیریز کے ڈیزائنز کی شارٹ لسٹنگ سے تعبیر کیا تھا ـ جبکہ ان نتائج کے اعلان کا مقصد صرف فنکاروں کی کاوشوں کو سراہنا اور انعامات سے نوازنا تھا۔
ذرائع کے مطابق اسٹیٹ بینک کا کہنا ہے کہ مجوزہ نئی سیریز کے حتمی ڈیزائن معروف بین الاقوامی کمپنیاں ڈیزائن کر رہی ہیں ـ دسمبر 2024 تک یہ کمپنیاں نئے نوٹوں کے ڈیزائنز کے لیے اپنی تجاویز پیش کریں گی اور پھر اسٹیٹ بینک بورڈکی جانب سے منظور کردہ ڈیزائنز جنوری تک وفاقی حکومت کو پیش کیے جائیں گے ـ
اسٹیٹ بینک کا کہنا تھا کہ کل 9 ڈیزائنرز کے جانب سے بھیجے گئے 10 ڈیزائنز کو شارٹ لسٹ کیا گیا اور جن افراد کے ڈیزائن شارٹ لسٹ ہوئے ہیں انہیں انعامات دیے جائیں گے۔جن ڈیزائنز کو شارٹ لسٹ کیا ان میں 20 روپے، 50 روپے ، 100 روپے اور ہزار روپے کے نوٹ کا ایک ایک ڈیزائن جبکہ 10 روپے، 500 روپے اور 5 ہزار روپے کے نوٹوں کے دو دو ڈیزائن شامل تھے۔
