راولپنڈی — تھانہ آراے بازار کے علاقے میں رات گئے موٹر سائیکل سوار دو ڈاکوؤں اور پولیس پارٹی کے درمیان فائرنگ کا تبادلہ ہوا جس کے دوران ایک خطرناک اور مطلوب ملزم زخمی حالت میں گرفتار کر لیا گیا جبکہ اس کا ساتھی موقع سے فرار ہونے میں کامیاب ہو گیا۔
پولیس کے مطابق گرفتار ملزم کی شناخت وسیم کے نام سے ہوئی ہے جو راولپنڈی اور سرگودھا میں ڈکیتی اور چوری کی متعدد وارداتوں میں پولیس کو مطلوب تھا۔ ابتدائی معلومات کے مطابق ملزم سے چند روز قبل تھانہ ریس کورس کے علاقے میں شہری سے گن پوائنٹ پر چھینا گیا موٹر سائیکل اور اسلحہ بھی برآمد کر لیا گیا ہے۔
پولیس کا کہنا ہے کہ موٹر سائیکل سوار مشکوک افراد کو رکنے کا اشارہ کیا گیا تو انہوں نے فائرنگ شروع کر دی۔ جوابی کارروائی کے دوران ایک گولی کانسٹیبل اسد علی کو لگی تاہم وہ بلٹ پروف جیکٹ کی وجہ سے محفوظ رہے۔
واقعے کی اطلاع ملتے ہی سینئر پولیس افسران بھاری نفری کے ہمراہ موقع پر پہنچ گئے اور فرار ملزم کی تلاش کے لیے سرچ آپریشن شروع کر دیا گیا ہے۔ زخمی حالت میں گرفتار ملزم کو علاج معالجے کے لیے ہسپتال منتقل کر دیا گیا ہے۔
سی پی او راولپنڈی سید خالد محمود ہمدانی نے پولیس ٹیم کی جرات مندانہ کارروائی کو سراہتے ہوئے ایس پی پوٹھوہار، ایس ڈی پی او کینٹ اور تھانہ آراے بازار پولیس کو شاباش دی ہے۔
انہوں نے کہا کہ شہریوں کی جان و مال پر حملہ کرنے والے عناصر قانون کی گرفت سے نہیں بچ سکتے۔ ترجمان راولپنڈی پولیس کے مطابق علاقے میں سرچنگ کا عمل جاری ہے۔
