لاہور: پنجاب کابینہ نے مالی سال 2026-27 کے لیے 5903 ارب روپے کے صوبائی بجٹ کی منظوری دے دی۔ بجٹ کی منظوری وزیراعلیٰ پنجاب مریم نواز شریف کی زیر صدارت کابینہ اجلاس میں دی گئی۔
اجلاس میں صوبائی وزیر خزانہ مجتبیٰ شجاع الرحمن نے کابینہ کو بجٹ کے اہم نکات پر تفصیلی بریفنگ دی۔ بریفنگ میں بتایا گیا کہ پنجاب کے بجٹ کا مجموعی حجم 5903 ارب روپے رکھا گیا ہے، جبکہ ترقیاتی منصوبوں کے لیے 752 ارب روپے مختص کرنے کی تجویز دی گئی ہے۔
بجٹ میں سرکاری ملازمین کی تنخواہوں اور پنشن میں 7 فیصد اضافے کی تجویز بھی شامل ہے۔ اجلاس میں سینئر وزیر مریم اورنگزیب، صوبائی وزراء، چیف سیکرٹری، چیئرمین پی اینڈ ڈی، سیکرٹری خزانہ اور دیگر اعلیٰ افسران نے شرکت کی۔
وزیراعلیٰ پنجاب مریم نواز شریف نے کہا کہ وہ تیسرا بجٹ پیش کرنے پر اللہ تعالیٰ کا شکر ادا کرتی ہیں۔ انہوں نے کہا کہ پنجاب نے وفاقی حکومت کو دفاع سمیت دیگر مدات میں سب سے زیادہ حصہ دیا ہے۔
مریم نواز کا کہنا تھا کہ این ایف سی شیئر کم ہونے کے باوجود پنجاب حکومت اپنے وسائل سے عوام کو ریلیف دینے کے لیے پرعزم ہے۔ انہوں نے کہا کہ عوامی ریلیف کا وعدہ پورا کرنے کے لیے وہ علالت کے دوران بھی ویڈیو لنک کے ذریعے اجلاس کرتی رہیں۔
وزیراعلیٰ پنجاب نے مزید کہا کہ عوام کی خدمت اور ریلیف کا سفر پہلے کی طرح جاری رہے گا، جبکہ پنجاب کے عوام کی ترقی پر کوئی سمجھوتہ نہیں کیا جائے گا۔
