اسلام آباد: ملک بھر کے سرکاری ملازمین کو اگلے ہفتے محرم الحرام کے موقع پر مسلسل 4 چھٹیاں ملنے کا امکان ہے۔ تاہم تعطیلات سے متعلق باقاعدہ نوٹیفکیشن وفاقی حکومت کی جانب سے جاری کیا جائے گا۔
تفصیلات کے مطابق محرم الحرام کا چاند نظر نہ آنے کے بعد نئے اسلامی سال 1448 ہجری کا آغاز 17 جون بروز بدھ سے ہوگا۔ اس حساب سے 9 محرم الحرام 25 جون بروز جمعرات اور 10 محرم الحرام یعنی یومِ عاشور 26 جون بروز جمعہ کو ہوگا۔
وفاقی حکومت ہر سال 9 اور 10 محرم الحرام کو ملک بھر میں عام تعطیل کا اعلان کرتی ہے۔ اس بار 9 محرم جمعرات اور 10 محرم جمعہ کو آئے گا، جبکہ اس کے فوراً بعد ہفتہ اور اتوار کی ہفتہ وار چھٹیاں ہوں گی۔
اس طرح وفاقی اور صوبائی سرکاری ملازمین کو جمعرات، جمعہ، ہفتہ اور اتوار سمیت مسلسل 4 روز کی تعطیلات مل سکتی ہیں۔
ذرائع کے مطابق سرکاری تعطیلات سے متعلق حتمی اور باقاعدہ نوٹیفکیشن وفاقی حکومت کی جانب سے جلد جاری کیا جائے گا، جس کے بعد چھٹیوں کے شیڈول کی باضابطہ تصدیق ہو جائے گی۔
دوسری جانب خیبر پختونخوا حکومت نے یکم محرم الحرام 1448 ہجری کے موقع پر صوبے بھر میں عام تعطیل کا اعلان کر دیا ہے۔ اس سلسلے میں صوبائی محکمہ ایڈمنسٹریشن کی جانب سے اعلامیہ بھی جاری کیا گیا ہے، جس کے تحت 17 جون بروز بدھ صوبے کے سرکاری دفاتر، اسکولوں اور کالجوں میں چھٹی ہوگی۔
