وزیراعظم شہباز شریف اور فیلڈ مارشل عاصم منیر نے اس عزم کا اظہار کیا ہے کہ بیرونی سرپرستی میں ہونے والی دہشتگردی کے خلاف جنگ کو اپنے منطقی اور فیصلہ کن انجام تک پہنچایا جائے گا ۔
کوئٹہ: خضدار میں سکول بچوں کی گاڑی پر حملے کے بعد وزیراعظم شہبازشریف او فیلڈ مارشل عاصم منیر ایک روزہ ہنگامی دورے پر کوئٹہ پہنچے جہاں ان کو خضدار حملے اور صوبے کی موجودہ صورتحال پر تفصیلی بریفنگ دی گئی ۔
وزیراعظم آفس سے جاری بیان کے مطابق وزیراعظم شہباز شریف،فیلڈ مارشل عاصم منیر اور وفاقی و صوبائی وزرا نے کوئٹہ میں زخمی بچوں کی عیادت کی ۔
اس موقع پر وزیراعظم شہبازشریف کا کہنا تھا خضدار میں سکول بس پر حملہ بھارتی سرپرستی میں دہشت گردی کی بدترین مثال ہے، بھارت اپنے ریاستی ایجنٹوں کے ذریعے بچوں کو نشانہ بنا رہا ہے ۔
انہوں نے کہا کہ خضدار حملے میں 3 بچے اور 2 جوان شہید جبکہ 53 زخمی ہوئے، دہشتگردی کے واقعے میں39 زخمی بچوں میں سے 8 کی حالت تشویشناک ہے ۔
وزیر اعظم آفس کا کہنا ہے کہ بھارت کے دہشتگرد گروہ بلوچ اور پشتون عوام کے نام کو داغدار کر رہے ہیں، عالمی برادری بھارت کی دہشتگردی کو بے نقاب کرے اور پاکستان دشمنوں کو منطقی انجام تک پہنچائے گا ۔
وزیراعظم شہباز شریف کا کہنا تھاکہ قوم فوج اور قانون نافذ کرنے والے اداروں کے ساتھ پوری قوت سےکھڑی ہے اور قوم دہشت گردی کے خاتمے، ملکی خودمختاری اور سلامتی کے تحفظ کےلیے متحد ہے ۔
وزیر اعظم اور فیلڈ مارشل کا کہنا تھاکہ وقت آ گیا ہے قوم وہی پختہ عزم دکھائے جو بھارتی جارحیت کے خلاف دکھایا گیا، انہوں نے اس عزم کا اظہار کیا کہ بیرونی سرپرستی میں جاری دہشت گردی کے خلاف جنگ کو منطقی اور فیصلہ کن انجام تک پہنچایا جائے گا ۔
