پی ایس ایل 10 کے پہلے کوالیفائر میں کوئٹہ گلیڈی ایٹرز نے اسلام آباد یونائٹڈ کو 30 رنز سے شکست دے کر فائنل کیلئے کوالیفائی کرلیا،210رنز ہدف کے تعاقب میں یونائٹڈ کی پوری ٹیم آخری اوور میں 179 رنز پر ہمت ہار گئی ۔
لاہور میں کھیلے گئے میچ میں کوئٹہ گلیڈی ایٹرز نے ٹاس جیت کر پہلے بہٹنگ کا فیصلہ کیا اور مقررہ اوور میں 6 وکٹوں کے نقصان پر 209رنز بنائے ۔
کوئٹہ گلیڈی ایٹرز کی جانب سے دنیش چندیمل 48 رنز ناٹ آؤٹ بنا کر نمایاں رہے، فہیم اشرف 45، فِن ایلن 41، اویشکا فرننڈو 32، رائلی روسو 16، کپتان سعود شکیل12 اور حسن نواز 6 رنز بنا کر آؤٹ ہوئے ۔
اسلام آباد یونائٹڈ کی جانب سے بین ڈی وارشیوس اور سلمان ارشاد نے دو ،دو جبکہ عماد وسیم اور شاداب خان نے ایک ایک وکٹ حاصل کی ۔
210 رنز ہدف کے تعاقب میں اسلام آباد یونائٹڈ کی پوری ٹیم 19.4 اوور میں 179 رنز بناکر آوٹ ہو گئی،صاحبزادہ فرحان 52 رنز بنا کر نمایاں رہے، سلمان آغا 44، رسی وین ڈر ڈوسن 35، کپتان شاداب خان 16، عماد وسیم 5، جیمی نیشم 1جبکہ نسیم شاہ اور ایلکس ہیلز کھاتا کھولے بغیر ہی پویلین لوٹ گئے ۔
گلیڈی ایٹرز کی جانب سے عثمان طارق نے 3، محمد عامر اور فہیم اشرف نے 2، 2 جبکہ ابرار احمد اور محمد وسیم نے 1، 1 وکٹ اپنے نام کی ۔
شاندار 45 رنز اور 2 وکٹیں حاصل کرنے پر کوئٹہ گلیڈی ایٹرز کے فہیم اشرف میچ کے بہترین کھلاڑی قرار دیئے گئے، اسلام آباد یونائٹڈ کل لاہور قلندرز اور کراچی کنگز کے درمیان کھیلے جانے والے ایلی منیٹر جیتنے والی ٹیم کے ساتھ کوالیفائر ٹو میں مد مقابل ہوگی ۔
