پشاور کے علاقے حسن خیل میں فیڈرل کانسٹیبلری کی چیک پوسٹ پر دہشتگردوں نے حملہ کیا ، سیکیورٹی اہلکاروں نے فوری جوابی کارروائی میں 8 حملہ آور ہلاک ہو گئے ،دہشتگردوں کے ساتھ فائرنگ کے تبادلے میں فیڈرل کانسٹیبلری کے 6 اہلکار وطن پر قربان ہوگئے ۔
سیکیورٹی ذرائع کے مطابق پشاور کے علاقے حسن خیل میں فیڈرل کانسٹیبلری کی ایک چیک پوسٹ پر مسلح حملہ آوروں کی جانب سے حملے کے بعد قبضے کی کوشش کی گئی جسے سیکیورٹی اہلکاروں نے فوری جوابی کارروائی میں ناکام بنا دیا ۔
سیکیورٹی ذرائع کے مطابق حملہ آوروں نے پوسٹ پر حملہ کیا، تاہم فیڈرل کانسٹیبلری کے جوانوں نے فوری اور مؤثر جوابی کارروائی کرتے ہوئے 8 حملہ آوروں کو اپنے انجام تک پہنچا دیا ۔
اس موقع پر دہشتگردوں کے ساتھ جھڑپ میں فیڈرل کانسٹیبلری کے 6 اہلکار شہید ہو گئے، شہید اہلکاروں کی نمازِ جنازہ فیڈرل کانسٹیبلری ہیڈکوارٹر پشاور میں ادا کی گئی، جس میں وفاقی وزیر داخلہ محسن نقوی، آئی جی پی ذوالفقار حمید اور وزیر مملکت طلال چودھری سمیت اعلیٰ سول و عسکری حکام نے شرکت کی ۔
نمازِ جنازہ میں آئی جی فرنٹیئر کور نارتھ میجر جنرل راؤ عمران سرتاج ، آئی جی خیبرپختونخوا پولیس، آئی جی فیڈرل کانسٹیبلری، کمانڈنٹ نیشنل پولیس اکیڈمی، ڈی جی ایف آئی اے، ڈی جی نیشنل سائبر کرائم انویسٹی گیشن ایجنسی، کمشنر اور ڈپٹی کمشنر پشاور سمیت دیگر اعلیٰ افسران بھی شریک ہوئے ۔
شہداء میں نائیک عامر، لانس نائیک محمد یوسف، لانس نائیک محمد ریاض، سپاہی اجمیر، احسان اور ریاض شامل ہیں ۔
حکام نے شہداء کے اہل خانہ سے ملاقات کی، تعزیت کا اظہار کیا اور ان کے بلند حوصلے کو سراہا، انہوں نے کہا کہ شہداء کی قربانیاں رائیگاں نہیں جائیں گی اور پوری قوم اپنے بہادر سپوتوں کو ہمیشہ یاد رکھے گی ۔
