پاکستان کے لیے ایک اعشاریہ دو ارب ڈالر کی سعودی آئل فیسلٹی کی مدت ختم ہو چکی ہے، جس کے بعد پاکستان نے سعودی عرب سے اس سہولت میں مزید دو سال کی توسیع کے لیے باضابطہ درخواست کر دی ہے۔ تاہم اس معاملے پر وزارت خزانہ اور وزارت پٹرولیم نے مؤقف دینے سے گریز کیا ہے۔
مختلف ذرائع ابلاغ کی رپورٹس کے مطابق پاکستان چاہتا ہے کہ سعودی آئل فیسلٹی کو بین الاقوامی مالیاتی فنڈ (آئی ایم ایف) کے پروگرام کی تکمیل تک جاری رکھا جائے، تاکہ زرمبادلہ کے ذخائر پر دباؤ کم کیا جا سکے۔
رپورٹس کے مطابق پاکستان نے سعودی حکام سے آئل فیسلٹی کی مدت میں مزید دو سال کی توسیع کی درخواست کی ہے۔ ماہرین کا کہنا ہے کہ اگر پاکستان کو یہ توسیع مل جاتی ہے تو اس سے آئی ایم ایف پروگرام میں نظم و ضبط برقرار رکھنے میں مدد ملے گی اور توانائی کے شعبے میں استحکام پیدا ہوگا۔
دوسری جانب وزارت پٹرولیم اور وزارت خزانہ نے اس حساس معاملے پر تاحال کوئی سرکاری مؤقف دینے سے گریز کیا ہے۔
