ریاض: پاکستان اور سعودی عرب کے درمیان سکیورٹی کے شعبے میں تعاون کو مزید مضبوط بنانے کے لیے مفاہمتی یادداشت پر دستخط کر دیے گئے۔
سعودی عرب کے وزیرِ داخلہ شہزادہ عبدالعزیز بن سعود بن نائف نے پاکستان کے وزیرِ داخلہ محسن نقوی کے ہمراہ ریاض میں سکیورٹی تعاون سے متعلق مفاہمتی یادداشت پر دستخط کیے۔
سعودی وزیرِ داخلہ کی جانب سے جاری بیان میں کہا گیا کہ دونوں ممالک نے سکیورٹی تعاون کو مضبوط بنانے کے لیے اپنے مشترکہ عزم کا اعادہ کیا ہے۔ انہوں نے کہا کہ سکیورٹی کے شعبے میں مفاہمتی یادداشت پر دستخط پاکستان اور سعودی عرب کے قریبی تعلقات کا اہم مظہر ہیں۔
شہزادہ عبدالعزیز بن سعود بن نائف کا کہنا تھا کہ یہ اقدام مملکت سعودی عرب اور اسلامی جمہوریہ پاکستان کے درمیان اسٹریٹجک شراکت داری کی مضبوطی اور دیرینہ تعلقات کی وسعت کو ظاہر کرتا ہے۔
دورے کے دوران وفاقی وزیرِ داخلہ محسن نقوی نے ریاض ریجن میں متحدہ سکیورٹی آپریشنز سینٹر 911 کا بھی دورہ کیا۔ انہیں سکیورٹی آپریشنز، ایمرجنسی رسپانس سسٹم اور جدید نگرانی کے نظام سے متعلق بریفنگ دی گئی۔
پاکستان اور سعودی عرب کے درمیان دفاعی، سکیورٹی اور انسدادِ جرائم کے شعبوں میں تعاون پہلے سے موجود ہے۔ نئی مفاہمتی یادداشت سے دونوں ممالک کے اداروں کے درمیان رابطوں، تجربات کے تبادلے اور مشترکہ سکیورٹی تعاون کو مزید فروغ ملنے کی توقع ہے۔
