ڈونیڈن میں کھیلے گئے بارش سے متاثرہ میچ میں نیوزی لینڈ نے ٹاس جیت کر پاکستان کو بیٹنگ کی دعوت دی تو ایک بار پھر قومی ٹیم کا آغاز اچھا نہ رہا ۔
حسن نواز صفر اور محمد حارث 11 رنز بناکر پویلین لوٹ گئے، عرفان نیازی 11 اور خوشدل شاہ 2 رنز ہی بناسکے ۔
سلمان علی آغا نے 46 اور شاداب خان نے 26 رنز بناکر پاکستان کا سکور بہتر کیا، شاہین شاہ آفریدی نے بھی آخر میں 22 رنز سکور کیے ۔ پاکستان نے مقررہ اوورز میں 9 وکٹوں کے نقصان پر 135 رنز بنائے ۔
نیوزی لینڈ کے جیکب ڈفی، جیمز نیشم، اِش سودھی اور بین سیئرز نے 2، 2 وکٹیں لیں ۔
ہدف کے تعاقب میں کیوی اوپنرز نے انتہائی جارحانہ آغاز کیا اور محض 4 اوورز میں ہی ٹیم کا سکور 50 تھا، تاہم 66 رنز کے مجموعے پر 22 گیندوں پر 45 رنز کی برق رفتار اننگز کھیلنے والے ٹم سیفرٹ آوٹ ہوگئے ۔
نیوزی لینڈ کے دوسرے جارح مزاج اوپنر فِن ایلن نے بھی 16 گیندوں پر 38 رنز کی برق رفتار اننگز کھیلی جس کے بعد جہانداد خان نے انہیں پویلین بھیجا ۔
دونوں اوپنرز کے آؤٹ ہونے کے بعد کیوی بلے بازوں کے رنز بنانے کی اوسط میں کمی آئی لیکن عمدہ آغاز فراہم ہونے کی وجہ سے انہیں زیادہ مشکل پیش نہ آئی اور نیوزی لینڈ نے مطلوبہ ہدف 14ویں اوور میں 5 وکٹوں کے نقصان پر باآسانی حاصل کرلیا ۔
نیوزی لینڈ کے کے بلے بازوں نے مجموعی طور پر پاکستانی باؤلرز کو 11 چھکے لگائے۔ جن میں صرف شاہین شاہ آفریدی کو ایک اوور میں 4 چھکے لگے ۔
پاکستان کی طرف سے حارث رؤف نے بہتر باؤلنگ کا مظاہرہ کرتے ہوئے تین اوور میں 20 رنز دے کر دو وکٹیں حاصل کیں، جگہ محمد علی، جہانداد خان اور خوشدل شاہ نے ایک ایک کھلاڑی کو آؤٹ کیا ۔
کیویز کو پانچ ٹی ٹوئنٹی میچوں کی سیریز میں 0-2 کی برتری حاصل ہوگئی ہے ۔
