پاکستان کا خواب دیکھنے اور ملی شاعری سے اپنی قوم کو بیدار کرنے والے حکیم الامت، شاعر مشرق علامہ محمد اقبال کا 149 واں یوم پیدائش آج منایا جارہا ہے،مزار اقبال پر گارڈز کی تبدیلی کی پروقار تقریب ہوئی، پاکستان نیوی کے سٹیشن کمانڈر لاہور کموڈور مصباح الامین مہمان خصوصی تھے ۔
پاکستان نیوی کے سٹیشن کمانڈر لاہورکموڈور مصباح الامین نے مزار اقبال پرپھول چڑھائے، فاتحہ خوانی کی، مہمان خصوصی نے گارڈز میں شامل پاکستان رینجرز اورپاک بحریہ کے دستوں کا معائنہ کیا، پاک بحریہ کے چاق و چوبند دستے نے مزار اقبال پر اعزازی گارڈز کے فرائض سنبھال لیے ۔
شاعر مشرق کی زندگی، شاعری اور تعلیم : ۔
شاعر مشرق علامہ محمد اقبال 9 نومبر 1877 کو سیالکوٹ میں پیدا ہوئے ، گورنمنٹ کالج لاہور اور پھر برطانیہ و جرمنی سے اعلیٰ تعلیم حاصل کی ، قومی درد میں ڈوبی شاعری کی ، ملت اسلامیہ کو یقین محکم کا راستہ دکھایا، ان کے افکار کا اثر پوری دنیا میں نظر آتا ہے ۔
علامہ اقبالؒ کے معروف مجموعہ کلام میں بانگ درا، ضرب کلیم، ارمغان حجاز اور بال جبریل شامل ہیں، موجودہ حالات اس بات کا تقاضا کرتے ہیں کہ علامہ اقبالؒ کے کلام کے ذریعے اتحاد اور یگانگت کا پیغام عام کیا جائے ۔
مفکر پاکستان علامہ اقبالؒ نے اپنی شاعری سے برصغیر کی مسلم قوم میں بیداری کی نئی روح پھونک دی، علامہ اقبالؒ کی کاوشوں سے ہی تحریک پاکستان نے زور پکڑا اور قائداعظم محمد علی جناحؒ کی قیادت میں 14 اگست 1947ء کو ایک آزاد وطن پاکستان حاصل کرلیا ۔
پاکستان کی آزادی سے قبل ہی علامہ اقبال 21 اپریل 1938ء کو انتقال کر گئے تھے تاہم ایک عظیم شاعر اور مفکر کے طور پر قوم ہمیشہ ان کی احسان مند رہے گی، قوم کے اس عظیم شاعر کا مزار لاہور میں بادشاہی مسجد کے احاطے میں واقع ہے ۔
یوم اقبال پر صدر مملکت کا پیغام: ۔
صدر مملکت آصف علی زرداری نے یوم اقبال کے موقع پر پیغام میں کہا ہے کہ علامہ اقبال کےکلام نے برصغیر کے مسلمانوں کو مستقبل کافیصلہ خود کرنے کی طاقت کا احساس دلایا۔
صدر مملکت نے کہا کہ علامہ اقبال نے برصغیر کے مسلمانوں کی امنگوں کو فکری رہنمائی دی، علامہ اقبال کی شاعری میں آزادی، باعزت زندگی کےحصول کی جدوجہد کا پیغام ہے ۔
صدر مملکت نے کہا کہ علامہ اقبال کی شاعری نے استحصال کے خلاف آواز اٹھائی، علامہ اقبال کی شاعری نے غریبوں کو حقوق اور مقام کااحساس دلایا، ان کی شاعری نے محنت کرنے والوں کی عزت و وقار کو اہمیت دی ۔
شاعرِ مشرق علامہ محمد اقبال کو منفرد انداز میں خراجِ عقیدت: ۔
دوسری جانب یوم اقبال کے موقع پر بوسنیا کے حیات ٹی وی نے شاعرِ مشرق علامہ محمد اقبال کو منفرد انداز میں خراجِ عقیدت پیش کیا ہے، اس سلسلے میں خصوصی دستاویزی فلم تیار کی گئی ہے، جس میں علامہ اقبال کی زندگی، فکر اور آفاقی پیغام کو اجاگر کیا گیا ہے ۔
حیات ٹی وی کی خصوصی دستاویزی فلم میں علامہ اقبال کی فکر و عمل اور ان پر اثرانداز ہونے والی اہم شخصیات کا تذکرہ بھی شامل ہے، فلم میں شاعرِ مشرق کی شہرۂ آفاق تصانیف اور مختلف مشاہیر کی جانب سے ان کی شخصیت اور فکر کے حوالے سے آرا بھی پیش کی گئی ہیں ۔
