نئی دہلی: نامعلوم ہیکرز کی جانب سے بھارتی نیوز چینلز پر سائبر حملوں کا سلسلہ جاری ہے۔ تازہ واقعے میں بھارتی نیوز چینل اے بی پی نیوز کو ہیک کیے جانے کی اطلاعات سامنے آئی ہیں۔
رپورٹس کے مطابق ہیکرز نے اے بی پی نیوز کے آن لائن سسٹمز کو نشانہ بنایا، جس کے باعث چینل کی نشریات متاثر ہوئیں۔ ہیکنگ کے بعد چینل کے ڈیجیٹل پلیٹ فارمز پر بھی خلل پیدا ہوا۔
اطلاعات کے مطابق اے بی پی نیوز کی اینڈرائیڈ اور آئی او ایس ایپس کو بھی سائبر حملے کا نشانہ بنایا گیا۔ ہیکرز نے چینل کے آن لائن اسٹریمنگ پلیٹ فارمز پر قرآنی آیت اور ویڈیو بھی نشر کی۔
اے بی پی نیوز بھارت کے بڑے نیوز چینلز میں شمار ہوتا ہے۔ چینل کے یوٹیوب پر تقریباً 15 ملین سبسکرائبرز ہیں، جبکہ اس کی ماہانہ ویورشپ کا اندازہ 124 ملین بتایا جاتا ہے۔
اے بی پی نیوز کا آغاز 1998 میں ہوا تھا۔ ابتدائی طور پر یہ چینل اسٹار نیوز کے نام سے جانا جاتا تھا، بعد میں اسے اے بی پی نیوز کے نام سے ری برانڈ کیا گیا۔
ماہرین کے مطابق بھارتی نیوز چینلز پر مسلسل سائبر حملوں نے بھارت کے ڈیجیٹل سیکیورٹی نظام پر سوالات کھڑے کر دیے ہیں۔ ان کا کہنا ہے کہ بھارت خود کو آئی ٹی کے شعبے میں مضبوط ملک قرار دیتا ہے، لیکن حالیہ واقعات نے اس کے سائبر سیکیورٹی نظام کی کمزوریاں ظاہر کر دی ہیں۔
ماہرین کا مزید کہنا ہے کہ میڈیا اداروں پر اس نوعیت کے حملے صرف نشریاتی نظام کے لیے خطرہ نہیں بلکہ ڈیجیٹل انفراسٹرکچر کے لیے بھی ایک بڑا چیلنج ہیں۔
رپورٹس کے مطابق بھارتی حکام نے واقعے کی تحقیقات شروع کر دی ہیں، تاہم ہیکرز کی شناخت تاحال سامنے نہیں آ سکی۔
