تہران: پاکستان میں ایران کے سفیر رضا امیری مقدم نے سماجی رابطے کی ویب سائٹ ایکس پر پیغام میں کہا ہے کہ میں اپنی اور ایران کی حکومت و عوام کی جانب سے پاکستانی حکومت و عوام کا گہرا شکرگزار ہوں کہ انہوں نے ایران کے سپریم لیڈر شہید آیت اللہ سید علی خامنہ ای کے لیے منعقدہ خراجِ عقیدت کی تقریب میں اپنے اعلیٰ سطح وفد کو شرکت کے لیے بھیجا۔
ایرانی سفیر رضا امیری مقدم نے کہا کہ میں وزیرِ اعظم محمد شہباز شریف، نائب وزیرِ اعظم و وزیرِ خارجہ محمد اسحاق ڈار، فیلڈ مارشل سید عاصم منیر، چیف آف آرمی سٹاف و چیف آف ڈیفنس سٹاف، چیئرمین سینیٹ سید یوسف رضا گیلانی، سپیکر قومی اسمبلی سردار ایاز صادق، وزیرِ داخلہ محسن نقوی، وزیرِ اطلاعات عطاء اللہ تارڑ، اور تمام معزز حکام، ممتاز علمائے کرام، سیاسی شخصیات اور ثقافتی رہنماؤں کا اس تاریخی موقع پر شرکت اور ایران کی حکومت و عوام سے اظہارِ یکجہتی پر دل کی گہرائیوں سے شکرگزار ہوں۔
انہوں نے کہا کہ مجھے انتہائی فخر ہے کہ پاکستان نے اس پر وقار تقریب میں اعلیٰ ترین سطح پر شرکت کی.
انہوں نے کہا کہ پاکستانی وفد نہ صرف سب سے اعلیٰ سطح بلکہ تعداد کے اعتبار سے بھی سب سے بڑا وفد ثابت ہوا۔
انہوں نے کہا کہ اس قدر معزز، اعلیٰ سطح اور کثیر تعداد میں وفد کی شرکت ہمارے دونوں برادر ممالک کے درمیان دیرینہ دوستی، باہمی احترام اور برادرانہ تعلقات کا مونہہ بولتا ثبوت ہے۔
انہوں نےکہا کہ یہ پُرمعنی اور تاریخی اقدام ہماری مشترکہ اقدار اور تاریخی رشتوں کی گہرائی کو ظاہر کرتا ہے جو ایران اور پاکستان کو تاریخ کے نشیب و فراز میں ہمیشہ متحد رکھتے ہیں۔
ایران کے سفیر رضا امیری مقدم نے کہا کہ ہماری دونوں اقوام نے ہمیشہ ایک دوسرے کی خوشیوں اور غموں میں شرکت کی ہے۔
بھائی چارے، یکجہتی اور باہمی تعاون کے جذبے سے کندھے سے کندھا ملا کر کھڑی رہی ہیں۔
رضا امیری مقدم نے کہا کہ میں دعا کرتا ہوں کہ الله تعالیٰ اس دیرپا دوستی اور بھائی چارے کو قائم رکھے۔
