سکردو میں ڈسٹرکٹ ایڈمنسٹریشن اور سپورٹس ڈیپارٹمنٹ کے زیرِ اہتمام تین روزہ “معرکۂ حق جشنِ بہاراں پولو ٹورنامنٹ” کا باقاعدہ آغاز ہو گیا ۔
سکردوافتتاحی تقریب میں ضلعی انتظامیہ کے افسران، مقامی عمائدین، کھلاڑیوں اور شائقین کی بڑی تعداد نے شرکت کی۔ تقریب کے دوران بلتی ثقافت کو اجاگر کرنے کے لیے روایتی موسیقی اور ثقافتی رقص پیش کیے گئے جسے حاضرین نے بے حد سراہا ۔
ٹورنامنٹ میں مختلف علاقوں کی ٹیمیں حصہ لے رہی ہیں جبکہ پہلے روز کھیلے گئے میچز میں کھلاڑیوں نے شاندار کھیل کا مظاہرہ کیا۔ دلچسپ اور سنسنی خیز مقابلوں کے باعث شائقین کا جوش و خروش دیدنی رہا اور میدان تالیوں سے گونجتا رہا ۔
ضلعی انتظامیہ کے مطابق اس ایونٹ کے انعقاد کا مقصد علاقے میں کھیلوں کے فروغ، نوجوانوں کو مثبت سرگرمیوں کی جانب راغب کرنے اور سیاحت کو بڑھانا ہے۔ حکام کا کہنا ہے کہ ایسے ایونٹس نہ صرف مقامی ٹیلنٹ کو ابھارنے میں مددگار ثابت ہوتے ہیں بلکہ علاقے کی ثقافت اور خوبصورتی کو بھی اجاگر کرتے ہیں ۔
تین روزہ پولو ٹورنامنٹ کے اختتام پر نمایاں کارکردگی دکھانے والی ٹیموں اور کھلاڑیوں میں انعامات تقسیم کیے جائیں گے ۔
