پشاور (شوبز ڈیسک) — کے ٹو اسلام آباد خیبر ٹیلی ویژن نیٹ ورک کے مقبول پروگرام “بیٹھک” میں پاکستان کے مایہ ناز پلے بیک سنگر احمد رشدی کو شاندار انداز میں خراجِ تحسین پیش کیا گیا۔
پروگرام میں معروف گلوکار عمران رشدی نے احمد رشدی مرحوم کے کلاسیکی فلمی نغمات اپنی مدھر آواز میں پیش کر کے محفل کو سحر انگیز بنا دیا۔ میزبان عارف محمود قاضی اور نوشین نے احمد رشدی کے فنی کیریئر اور خدمات پر روشنی ڈالتے ہوئے ناظرین کو ان کی زندگی کے اہم پہلوؤں سے آگاہ کیا۔
پروگرام کے دوران میزبان عارف محمود قاضی نے نوشین کے ساتھ گفتگو میں پاکستان کی حالیہ سفارتی کامیابیوں پر بھی بات کی اور امریکہ ایران مذاکرات میں پاکستان کے کردار کو سراہا۔ اس موقع پر فیلڈ مارشل سید عاصم منیر، وزیر اعظم شہباز شریف اور وزیر خارجہ اسحاق ڈار کی کوششوں کو بھی خراجِ تحسین پیش کیا گیا۔
شو کے اختتام پر شرکاء نے قومی پرچم تھام کر “پاکستان زندہ باد” کے فلک شگاف نعرے بھی بلند کیے جس سے ماحول مزید پرجوش اور حب الوطنی کے جذبے سے بھرپور ہو گیا۔
