ملک بھر میں 86واں یومِ پاکستان آج روایتی قومی جوش و جذبے کے ساتھ منایا جا رہا ہے، تاہم اس سال تقریبات سادگی تک محدود رکھی گئی ہیں، دن کا آغاز اسلام آباد میں 31 اور چاروں صوبوں میں 21، 21 توپوں کی سلامی سے ہوا ۔ جبکہ جوانوں نے اللہ اکبر، پاکستان زندہ باد اور پاک افواج زندہ باد کے نعرے لگائے ۔
اس سال یومِ پاکستان کے موقع پر پریڈ اور بڑی تقریبات منعقد نہیں کی جا رہی ہیں اور صرف پرچم کشائی کی تقریبات کا اہتمام کیا گیا ہے ۔
صدر مملکت آصف علی زرداری نے اپنے پیغام میں کہا کہ یوم پاکستان قوم کو یاد دلاتا ہے کہ اتحاد و یکجہتی ہی ترقی کی بنیاد ہے ۔
انہوں نے کہا کہ پاکستان نے اپنی دفاعی صلاحیت کو مضبوط بنایا ہے، جوہری صلاحیت حاصل کی اور دہشت گردی کے خلاف کامیاب جنگ لڑی ۔
وزیراعظم شہباز شریف نے اپنے پیغام میں مشرقِ وسطیٰ کی صورتحال پر تشویش کا اظہار کرتے ہوئے کہا کہ پاکستان ایک ذمہ دار ریاست کے طور پر متوازن سفارت کاری جاری رکھے ہوئے ہے ۔
انہوں نے کہا کہ چیلنجز کے باوجود معیشت کو استحکام کی راہ پر ڈال دیا گیا ہے اور مثبت معاشی اشاریے درست سمت کی عکاسی کرتے ہیں ۔
وزیراعظم نے آپریشن بنیان المرصوص میں مسلح افواج کی کارکردگی کو سراہتے ہوئے افواج پاکستان اور قانون نافذ کرنے والے اداروں کو خراجِ تحسین پیش کیا اور مقبوضہ کشمیر کے عوام کی حمایت کا اعادہ بھی کیا ۔
یوم پاکستان کے موقع پر مسلح افواج کے سربراہان نے بھی قوم کو مبارکباد دی، آئی ایس پی آر کے مطابق 23 مارچ 1947 ایمان، امید اور استقامت کی علامت ہے اور پاکستان ترقی کی راہ پر گامزن ہے۔ مسلح افواج نے دہشت گردی اور انتہا پسندی کے خلاف عزم کا اعادہ کیا ۔
لاہور میں مزارِ اقبال پر گارڈز کی تبدیلی کی پروقار تقریب منعقد ہوئی، جہاں پاک فضائیہ کے چاق و چوبند دستے نے مارچ پاسٹ کیا اور اعزازی گارڈز کے فرائض سنبھالے۔ تقریب کے اختتام پر دعا بھی کی گئی ۔
