راولپنڈی اور اسلام آباد میں وقفے وقفے سے بارش اور مری میں برفباری کا سلسلہ جاری ہے،مری میں صبح سے شدید برفباری کا سلسلہ جاری ہے، جڑواں شہروں میں بھی وقفے وقفے سے بادل برس رہے ہیں۔
واسا کے ترجمان کے مطابق جڑواں شہروں میں مجموعی طور 40 ملی میٹر سے زائد بارش ریکارڈ کی جا چکی ہے،گولڑہ کے مقام 58 ملی میٹر، بوکڑہ 36 ملی میٹر، پی ایم ڈی 28 ملی میٹر، شمس آباد 21 ملی میٹر اور کچہری کے مقام پر 20 ملی میٹر بارش ریکارڈ کی گئی ہے۔
واٹر اینڈ سینیٹیشن ایجنسی کا کہنا ہےکہ نالہ لئی اور شہر کے دیگر نالوں میں پانی کا بہاؤ معمول کے مطابق ہے، راولپنڈی اور اسلام آباد میں 5 ماہ کے بعد ہونے والی بارش سے خشک سالی کے خاتمے میں مدد ملے گی۔
ترجمان واسا کے مطابق بارش کے بعد راول ڈیم اور خان پور ڈیم میں پانی کے ذخیرے میں اضافہ ہوگا جس سے پینے کے پانی کی ضروریات کو پورا کرنے میں مدد ملے گی ۔
دوسری جانب محکمہ موسمیات نے بارش کا سلسلہ شام تک جاری رہنے کی پیشنگوئی کی ہے۔ واسا راولپنڈی ہائی الرٹ ہے، سٹاف ہیوی مشینری کے ساتھ فیلڈ میں موجو ہے، کسی بھی علاقے سے پانی کھڑا ہونے کی اطلاع موصول نہیں ہوئی ۔
