اسلام آباد: وزیراعظم شہبازشریف نے چیف جسٹس پاکستان جسٹس یحییٰ آفریدی سے چیف جسٹس ہاوس اسلام آباد میں اہم ملاقات کی ہے ، ملاقات کے دوران ٹیکس کیسز، لاپتہ افراد، عدالتی اصلاحات اور دیگر اہم امور پر بات چیت ہوئی ہے ۔
اعلامیے کے مطابق وزیر اعظم نے چیف جسٹس کو اپنی ذمہ داریاں سنبھالنے پر مبارکباد پیش کی اور نیک خواہشات کا اظہار کیا ، اس موقع پر وزیرِ اعظم نے چیف جسٹس کے جنوبی پنجاب، اندرون سندھ اور خیبر پختونخوا کے دور دراز علاقوں کے دورے کو بھی سراہا۔ اعلامیے کے مطابق وزیر اعظم نے چیف جسٹس کے انصاف کی بروقت فراہمی کیلئے تمام اسٹیک ہولڈرز سے مشاورت کو سراہا ۔
اعلامیے میں بتایا گیا ہے کہ ملاقات میں وزیرِ اعظم نے ملکی معاشی و سکیورٹی چیلنجز پر بھی گفتگو کی اور ملک کی مختلف عدالتوں میں طویل مدت سے زیر التوا ٹیکس تنازعات کے حوالے سے آگاہ کیا ۔
اعلامیے کے مطابق وزیراعظم نے چیف جسٹس سے ان کیسز میں میرٹ پر جلد فیصلوں کی استدعا کی جبکہ چیف جسٹس نے وزیراعظم سےنظام انصاف میں بہتری لانے کیلئے تجاویز بھی مانگ لیں ۔
چیف جسٹس یحییٰ آفریدی نے وزیراعظم کی نظام انصاف کی بہتری کیلئےگفتگو کا خیرمقدم کیا۔ وزیراعظم نے چیف جسٹس کولاپتا افراد سے متعلق اقدامات میں تیزی لانے کی بھی یقین دہانی کروائی ۔
