آئی سی سی چیمپئنز ٹرافی، نیوزی لینڈ نے پاکستانی ٹیم کو ہوم گراونڈ پر شکست دیتے ہوئے افتتاحی میچ 60 رنز سے اپنے نام کرلی ،کیویز کے 321 رنز کے ہدف کے جواب میں پاکستانی ٹیم 48 ویں اوور میں 260 رنز پر آوٹ ہوگئی ۔
کراچی کے نیشنل سٹیڈیم میں کھیلے گئے میچ میں قومی ٹیم کے کپتان محمد رضوان نے ٹاس جیت کر مہمان ٹیم کو بیٹنگ کی دعوت دینے کا فیصلہ کیا جو درست ثابت نہ ہو سکا ۔
نیوزی لینڈ نے مقررہ 50 اوورز میں پاکستان کے خلاف پہلے کھیلتے ہوئے 5 وکٹ کے نقصان پر 320 رنز بنائے، کیویز کی جانب سے سب سے زیادہ ٹام لیتھم نے شاندار ناٹ آوٹ 118 رنز کی اننگز کھیلی ، ویل ینگ نے بھی 107 رنز بنائے جبکہ گلِن فلپس نے جارحانہ 61 رنز کی اننگز کھیلی ۔
پاکستان کی جانب سے نسیم شاہ اور حارث رؤف نے 2،2 وکٹیں حاصل کیں، سپنر ابرار احمد نے ایک کھلاڑی کو پویلین بھیجا ، 321 رنز ہدف کے تعاقب میں قومی ٹیم نے سست روی سے آغاز کیا، پاکستان کے پہلے آؤٹ ہونے والے بیٹر سعود شکیل تھے جو 6 رنز بنا کر آؤٹ ہوئے،اس کے بعد 22 کے مجموعی سکور پر کپتان رضوان بھی پویلین لوٹ گئے انہوں نے 3 رنز بنائے ۔
پاکستان کی تیسری وکٹ 69 رنز پر گری جب فخرزمان 24 رنز بناکر آؤٹ ہوئے، پاکستان کے چوتھے آؤٹ ہونے والے کھلاڑی سلمان آغا تھے جنہوں نے مزاحمت کی کوشش کی تاہم وہ بھی 28 گیندوں پر 42 رنز بنا کر پویلین لوٹ گئے، ان کے بعد آنے والے طیب طاہر بھی جلد ہی وکٹ گنوا بیٹھے اور ایک رن پر آؤٹ ہوگئے۔ ان کے بعد بابراعظم بھی 153 کے مجموعی اؤسکور پر آؤٹ ہوگئے، بابر اعظم نے 90 گیندوں پر 64 رنز کی اننگز کھیلی ۔
پاکستان کی ساتویں وکٹ 200 رنز پر گری، شاہین شاہ آفریدی 14 رنز بنا کر آؤٹ ہوئے، ان کے بعد آؤٹ ہونے والے کھلاڑی خوشدل شاہ تھے جنہوں نے49 گیندوں پر 69 رنز کی اننگز کھیل کر ٹیم میں اپنی جگہ مضبوط کرلی ، پاکستان کی نویں وکٹ 260 رنز پر گری جب حارث رؤف 19 رنز بنا کر آؤٹ ہوئے، نسیم شاہ 13 رنز بناکر آؤٹ ہوئے ، اور یوں پوری قومی ٹیم 47.2 اوورز میں 260رنز بناکر آوٹ ہوئی ۔
نیوزی لینڈ کی جانب سے مچل سینٹنر اور ول او رورکی نے 3 ،3 ،میٹ ہینری نے 2 جبکہ مائیکل بریس ویل اور ناتھن سمتھ نے ایک ایک وکٹ حاصل کی ،نیوزی لینڈ کے ٹام لیتھم شاندار بیٹنگ پر پلیئر آف دی میچ قرار پائے، وہ 118 رنز بناکر ناٹ آؤٹ رہے، ان کی اننگز میں 3 چھکے اور 10 چوکے شامل تھے ۔
میگا ایونٹ میں پاکستان کا دوسرا اہم ترین میچ روایتہ حریف بہارت کے ساتھ 23 فروری کو دبئی میں کھیلا جائے گا، جبکہ کل بہارت اور بنگلہ دیش کے درمیان مقابلہ ہوگا، یہ میچ بھی دبئی میں پاکستان وقت کے مطابق دوپہر 2 بجے شروع ہوگا ۔
میچ کے آغاز سے قبل آئی سی سی چیمپئنز ٹرافی کی افتتاحی تقریب کے موقع پر پاک فضائیہ کی جانب سے فلائی پاسٹ کا شاندار مظاہرہ کیا گیا، پاک فضائیہ کی شیردل ٹیم نے فضاء میں سبز ہلالی پرچم کے رنگ بکھیرتے ہوئے پاکستانی قوم کو سلام پیش کیا ۔
