پاک فضائیہ نے افغان طالبان کی مبینہ بلااشتعال کارروائیوں کے جواب میں افغانستان کے مختلف علاقوں میں مؤثر فضائی حملے کیے ہیں۔ سکیورٹی ذرائع کے مطابق ننگرہار میں ٹھکانوں کی درست نشاندہی کے بعد ایک بڑا ایمونیشن ڈیپو مکمل طور پر تباہ کر دیا گیا، جبکہ مزید کارروائیاں جاری ہیں۔
ذرائع کے مطابق فضائی حملوں کا دائرہ کار وسیع کرتے ہوئے کابل، قندھار اور پکتیا میں بھی اہم عسکری تنصیبات کو نشانہ بنایا گیا۔ کابل میں دو بریگیڈ ہیڈکوارٹرز کو تباہ کیا گیا، جبکہ قندھار میں ایک کور ہیڈکوارٹر اور ایک بریگیڈ ہیڈکوارٹر کو شدید نقصان پہنچا۔
مزید بتایا گیا ہے کہ قندھار میں ایمونیشن ڈیپو اور لاجسٹک بیس کو بھی تباہ کر دیا گیا، جبکہ پکتیا میں ایک کور ہیڈکوارٹر کو نشانہ بنایا گیا۔
یاد رہے کہ پاک افغان سرحد پر افغان طالبان کی کارروائیوں کے بعد پاکستان نے آپریشن غضب للحق کا آغاز کیا تھا، جس کے تحت زمینی اور فضائی سطح پر جوابی اقدامات کیے جا رہے ہیں۔
سکیورٹی ذرائع کے مطابق پاکستانی سکیورٹی فورسز کی کارروائیوں سے طالبان کے متعدد ٹھکانے تباہ ہوئے اور کئی جنگجو فرار ہوگئے۔ کرم سیکٹر کے قریب کارروائی کے دوران مزید آٹھ طالبان جنگجو ہلاک کیے گئے۔ اب تک موصول ہونے والی مصدقہ اطلاعات کے مطابق تقریباً 44 افغان طالبان کی ہلاکت کی تصدیق کی گئی ہے۔
