وزیر مملکت برائے داخلہ طلال چوہدری نے جی سکس آبپارہ میں قائم رمضان سہولت بازار کا دورہ کیا۔
وزیر مملکت نے سبزی، پھل اور اشیائے ضروریہ کے مختلف سٹالز کا معائنہ کیا اور دکانداروں و خریداروں سے ملاقات کی۔ اس موقع پر شہریوں نے مناسب قیمتوں اور بہتر انتظامات پر حکومت کا شکریہ ادا کیا۔
ڈپٹی کمشنر اسلام آباد عرفان نواز میمن نے وزیر مملکت کو بازار کے انتظامات پر تفصیلی بریفنگ دی۔ طلال چوہدری نے صفائی اور سیکیورٹی انتظامات کو مزید بہتر بنانے کے لیے ضروری اقدامات کی ہدایت جاری کی۔
وزیر مملکت برائے داخلہ نے کہا کہ اشیائے خورونوش کی قیمتوں سے متعلق محمد شہباز شریف کے احکامات بالکل واضح ہیں۔ ان کا کہنا تھا کہ وزیراعظم خود قیمتوں کی نگرانی کرتے ہیں اور اگر دو روپے بھی اضافہ ہو تو اس پر پوچھ گچھ کرتے ہیں۔
طلال چوہدری نے واضح کیا کہ عوامی ریلیف میں کسی قسم کی کوتاہی برداشت نہیں کی جائے گی اور عوام کو سستی و معیاری اشیاء کی فراہمی حکومت کی اولین ترجیح ہے۔
