اسلام آباد: وفاقی وزیر داخلہ محسن نقوی نے تعمیرِ نو کے بعد تھانہ آبپارہ کا افتتاح کر دیا۔
وزیر داخلہ نے تھانہ آبپارہ کے مختلف سیکشنز کا دورہ کیا۔
محسن نقوی نے ایس ایچ او آفس، ڈی آر سی، انکوائری آفس، ویٹنگ ایریا سمیت دیگر شعبوں کا معائنہ کیا۔
وفاقی وزیر داخلہ نے تھانے کے کاؤنٹرز پر شہریوں کو فراہم کی جانے والی سہولیات کا جائزہ لیا۔
محسن نقوی نے سائلین کے لیے فراہم کردہ سہولیات پر اطمینان کا اظہار کیا۔
انہوں نے ڈسپیوٹ ریزولوشن کمیٹی کے ارکان سے ملاقات کی اور کمیٹی کے کردار کو سراہا۔
محسن نقوی کا کہنا تھا کہ اس منصوبے کا مقصد عوام کو جدید، باوقار اور عوام دوست پولیسنگ کا ماحول فراہم کرنا ہے۔
وزیر داخلہ نے کہا کہ سائلین کی داد رسی کے لیے کوئی کسر اٹھا نہ رکھی جائے۔
محسن نقوی نے ہدایت کی کہ سائل کی درخواست پر ہر صورت کارروائی یقینی بنائی جائے۔
وزیر داخلہ نے کہا کہ کسی شہری کو ایف آئی آر کے اندراج میں بلاوجہ تاخیر یا مشکلات کا سامنا نہیں ہونا چاہیے۔
تھانوں میں آنے والے شہریوں کے ساتھ خوش اخلاقی اور ذمہ دارانہ رویہ اپنایا جائے۔
آئی جی اسلام آباد پولیس نے وزیر داخلہ کو تھانے کی اپ گریڈیشن کے بارے میں بریفنگ دی۔
افتتاح کے موقع پر آئی جی اسلام آباد پولیس، ڈی آئی جی، ایس ایس پی آپریشنز اور دیگر پولیس افسران بھی موجود تھے۔
