راولپنڈی میں کہوٹہ کی عدالت میں پیشی کے بعد واپسی پر اڈیالہ جیل کے 14 قیدیوں کے جیل وین سے فرار ہونے کے معاملے میں اہم پیشرفت سامنے آئی ہے ۔
راولپنڈی: پولیس حکام کے مطابق ڈیوٹی پر مامور اڈیالہ جیل کے گارڈ انچارج سمیت 5 اہلکاروں کو حراست میں لے لیا گیا ہے جبکہ ان کے موبائل فونز بھی قبضے میں لے لیے گئے ہیں ۔
پولیس حکام نے بتایا کہ واقعے کے بعد ایس پی ہیڈکوارٹر کو عہدے سے ہٹا کر لاہور رپورٹ کرنے کے احکامات جاری کر دیے گئے ہیں جبکہ ڈی ایس پی ہیڈکوارٹر امتیاز احمد کو فوری طور پر معطل کر دیا گیا ہے ۔
دوسری جانب آئی جی پنجاب نے راولپنڈی پولیس حکام سے واقعے کی تفصیلی رپورٹ طلب کر لی ہے جبکہ فرار ہونے والے قیدیوں کی گرفتاری کے لیے آپریشن جاری ہے ۔
واضح رہے کہ گزشتہ شام کہوٹہ عدالت میں پیشی کےبعد 14 قیدی وین سے فرار ہوگئے تھے جن میں سے 4 قیدیوں کو دوبارہ گرفتار کرلیا گیا تھا ۔
