اسلام آباد: شنگھائی تعاون تنظیم کے رکن ممالک کے نمائندگان نے نیشنل ڈیزاسٹر مینجمنٹ اتھارٹی ہیڈکوارٹرز کا دورہ کیا۔
اس موقع پر ایس سی او وفد کو نیشنل ایمرجنسیز آپریشن سینٹر کے صلاحیتی دائرہ کار اور آفات سے نمٹنے کے لیے پاکستان کے جدید نظام سے آگاہ کیا گیا۔
چیئرمین این ڈی ایم اے لیفٹیننٹ جنرل انعام حیدر ملک نے وفد کو پاکستان کے فعال اور جدید ڈیزاسٹر مینجمنٹ نظام پر تفصیلی بریفنگ دی۔
وفد کو آفات کی پیشگی اطلاع، خطرات کی نشاندہی اور ہنگامی صورتحال سے نمٹنے کے جدید طریقہ کار سے آگاہ کیا گیا۔
این ڈی ایم اے حکام نے قدرتی آفات کے خطرات میں کمی کے لیے جدید ٹیکنالوجی، معلومات اور تحقیق پر مبنی نظام کے استعمال پر بھی بریفنگ دی۔
چیئرمین این ڈی ایم اے نے ایس سی او رکن ممالک کے درمیان قدرتی آفات سے نمٹنے، پیشگی اطلاع اور ہنگامی ردعمل کے شعبوں میں علاقائی تعاون کے فروغ پر زور دیا۔
انہوں نے آفات سے نمٹنے کے لیے مشترکہ حکمت عملی، پائیدار نظام اور مشترکہ اقدامات اپنانے کی تجویز دی۔
ایس سی او وفد نے پاکستان میں ڈیزاسٹر مینجمنٹ کے جدید نظام اور نیشنل ایمرجنسیز آپریشن سینٹر کی صلاحیتی استعداد کو بہتر بنانے کے لیے این ڈی ایم اے کی کوششوں کو سراہا۔
