لاہور:پنجاب کی وزیر اطلاعات عظمی بخاری نے کہا ہے کہ لاہور کی خوبصورتی اور ترقی کی مثالیں اب پاکستان کے دوسرے شہروں میں دی جا رہی ہیں۔ وزیر اطلاعات نے واضح کیا کہ اب پنجاب کے باقی شہروں کو بھی لاہور جیسا خوبصورت اور ترقی یافتہ بنایا جا رہا ہے، اور ترقی و خوبصورتی کا سفر لاہور تک محدود نہیں رہا۔
عظمی بخاری نے کہا کہ سابقہ تفریق کو ختم کرتے ہوئے وزیراعلیٰ مریم نواز نے پنجاب کے تمام شہروں میں ترقیاتی منصوبوں کا معیار برابر کر دیا ہے۔ اب نہ کوئی ساوتھ پنجاب، نہ سینٹرل پنجاب ،بس ایک پنجاب ہے۔انہوں نے مزید کہا کہ صحت، تعلیم اور انفراسٹرکچر کے جدید منصوبوں کا دائرہ کار پنجاب بھر میں وسیع کر دیا گیا ہے اور پہلی بار عوام کے ٹیکس کے پیسے شفاف طریقے سے ان کی فلاح و بہبود پر خرچ ہو رہے ہیں۔
عظمی بخاری نے کہا کہ پنجاب حکومت کے کھربوں روپے کے ترقیاتی منصوبوں پر کوئی بھی مخالف انگلی نہیں اٹھا سکتا، اور پنجاب میرٹ، گڈگورننس اور ترقی کے حوالے سے باقی صوبوں میں سرِ فہرست ہے۔ انہوں نے زور دیا کہ مریم نواز عوام کی ایک ایک پائی دیانتداری سے ان پر خرچ کر رہی ہیں، جس سے پورے صوبے میں ترقی کی نئی لہر آئی ہے۔
