وزیراعظم شہباز شریف نے گلگت بلتستان میں مختلف ترقیاتی منصوبوں کا افتتاح کرتے ہوئے مختلف سنگ بنیاد تقریبات میں شرکت کی ہے ، اس موقع پر وزیراعظم کا کہنا تھا کہ پاکستان کے خوبصورت ترین خطے کا دورہ کرکے انہیں خوشی محسوس ہو رہی ہے، وہ ہونہار اور محنتی طلبا سے ملاقات کیلئے یہاں آئے ۔
گلگت: وزیراعظم شہبازشریف ایک روزہ دورہ پر گلگت پہنچے جہاں انہوں نے گلگت اور سکردو میں سیف سٹی منصوبوں کا افتتاح کیا جبکہ خطے میں مفت سولر پینلز کی تقسیم کے توسیعی منصوبے کا بھی آغاز کیا، وزیراعظم نے گلگت میں 100 میگاواٹ شمسی توانائی منصوبے کا سنگ بنیاد بھی رکھا گیا، نے متعلقہ حکام کو ہدایت کی کہ شمسی توانائی کا منصوبہ آئندہ سال کے وسط تک مکمل کیا جائے ۔
تقریب سے خطاب کرتے ہوئے وزیراعظم کا کہنا تھا کہ ہونہار طلبا پاکستان کا فخر ہیں جنہوں نے اپنی محنت اور صلاحیت کے بل بوتے پر لیپ ٹاپ حاصل کیے، لیپ ٹاپ کسی احسان کے طور پر نہیں بلکہ طلبا کی تعلیمی قابلیت کے اعتراف میں دیے گئے ہیں اور تمام تقسیم مکمل طور پر میرٹ کی بنیاد پر کی گئی ۔
وزیراعظم نے کہا کہ مالی طور پر کمزور لیکن باصلاحیت طلبا کو بھی میرٹ پر لیپ ٹاپ فراہم کیے گئے جبکہ انہوں نے اپنے سیاسی سفر میں کبھی میرٹ پر سمجھوتہ نہیں کیا ۔
انہوں نے اعلان کیا کہ گلگت، غانچے، ستور اور سکردو میں 4 دانش سکول قائم کیے جائیں گے، جہاں طلبا اور طالبات کے لیے علیحدہ کیمپس ہوں گے اور تمام سہولیات مفت فراہم کی جائیں گی ۔
وزیراعظم شہباز شریف نے کہا کہ وہ ملک میں یکساں ترقی پر یقین رکھتے ہیں اور تمام صوبوں، آزاد کشمیر اور گلگت بلتستان کی ترقی ہی پاکستان کی مجموعی ترقی کی ضمانت ہے ۔
انہوں نے کہا کہ پاکستان نے ایران اور امریکہ کے درمیان جنگ بندی اور ثالثی کے عمل میں سیاسی و عسکری سطح پر مؤثر کردار ادا کیا ۔
وزیراعظم نے کہا کہ خطے میں امن کے قیام کے لیے پاکستان کی خدمات سنہری حروف میں لکھی جائیں گی جبکہ اسحاق ڈار اور سید عاصم منیر کی خدمات کو بھی ہمیشہ یاد رکھا جائے گا ۔
