پشاور ہائی کورٹ نے دو افغان صحافیوں سید احسان اللہ صالحی اور سید منیر احمد افغان کو پاکستان سے ڈی پورٹ کرنے سے روک دیا ہے۔
عدالت نے اپنے فیصلے میں وفاقی حکومت کو ہدایت کی ہے کہ درخواست گزاروں کے کیس کا دو ماہ کے اندر تعین کیا جائے۔
پشاور ہائی کورٹ کے مطابق دونوں درخواست گزار قانونی ویزے پر پاکستان آئے تھے اور اس وقت پاکستان میں مقیم ہیں۔ درخواست گزاروں کے مطابق انہوں نے فرانس میں مستقل رہائش کے لیے درخواستیں دے رکھی ہیں۔
عدالت کے فیصلے میں کہا گیا ہے کہ درخواست گزاروں کے مطابق ان کی درخواستیں فی الحال زیرِ غور ہیں، جبکہ فرانسیسی سفارتخانے نے بھی ان کے کیسز کی تصدیق کی ہے۔
عدالت کے مطابق وکیل نے مؤقف اختیار کیا کہ درخواست گزاروں کو گرفتاری اور ملک سے بے دخل کیے جانے کا خدشہ ہے، جس کے باعث وہ پاکستان میں آزادانہ نقل و حرکت نہیں کر سکتے۔
عدالت نے وزارت داخلہ کو ہدایت کی ہے کہ درخواست گزاروں کو عارضی اجازت فراہم کی جائے تاکہ وہ کیس کے فیصلے تک پاکستان میں قانونی طور پر رہ سکیں۔
