دوسرے ٹی ٹوئنٹی میچ میں بھی پاکستان نے سری لنکا کو 82 رنز سے شکست دے کر سیریز میں دو صفر کی فیصلہ کن برتری حاصل کرلی،پاکستان کے 216 رنز ہدف کے تعاقب میں مہمان ٹیم مقررہ اوورز میں 7 وکٹوں کے نقصان پر 133 رنز بنا سکی اور میچ ہار گئی، شاندار 96 رنز بنانے پر معاذ صداقت کو میچ کا بہترین کھلاڑی قرار دیا گیا ہے ۔
راولپنڈی کرکٹ سٹیڈیم میں کھیلے گئے تین میچز پر مشتمل ٹی ٹوئنٹی سیریز کے دوسرے میچ میں سری لنکا نے ٹاس جیت کر پہلے فیلڈنگ کا فیصلہ کیا اور پاکستان کو کھیلنے کی دعوت دی ۔
پاکستان نے مقررہ اوورز میں 3 وکٹوں کے نقصان پر 215 رنز بنائے، جس میں معاذ صداقت نے شاندار 96 اور کپتان صاحبزادہ فرحان نے 73 رنز بنائے، فخر زمان 22 اور حسن نواز 19 رنز بنا کر آؤٹ ہوئے، جبکہ سری لنکا کی طرف سے مہیش تھیکشانا، ایشان مہینگا اور دسون شناکا نے ایک ایک وکٹ حاصل کی ۔
مقررہ ہدف کے تعاقب میں سری لنکا کی پوری ٹیم 7 وکٹوں کے نقصان پر 133 رنز بنا سکی اور میچ 82 رنز سے ہار گئی، مہمان ٹیم کی طرف سے سب سے زیادہ مہیش تھیکشانا نے 32 اور چیمندو وکراماسنگے نے 29 رنز بنائے ۔
پاکستان کی طرف سے محمد عمران نے شاندار بولنگ کی اور 3 وکٹیں اپنے نام کیں، سلمان مرزا نے دو جبکہ صائم ایوب اور شاداب خان نے ایک ایک وکٹ حاصل کی، شاندار 96 رنز بنانے پر قومی ٹیم کے معاذ صداقت کو میچ کے بہترین کھلاڑی کا اعزاز دیا گیا، سیریز کا تیسرا اور آخری میچ منگل کو کھیلا جائے گا ۔
