پاک فوج کے شعبہ اطلاعات عامہ آئی ایس پی آر کی جانب سے جاری بیان میں کہا گیا ہے کہ سکیورٹی فورسز نے خیبرپختونخوا کے مختلف علاقوں میں تین الگ الگ کارروائیاں کی ہیں جن میں 11 دہشت گرد ہلاک ہو گئے ۔
آئی ایس پی آر کے مطابق سکیورٹی فورسز نے پہلی کارروائی ضلع ٹانک میں خفیہ اطلاعات کی بنیاد پر کی جس میں دہشت گردوں کے ٹھکانے کو مؤثر انداز سے نشانہ بنایا گیا، اس دوران 7 دہشت گرد ہلاک ہوگئے ۔
دوسری کارروائی شمالی وزیرستان کے علاقے دتہ خیل میں بھی خفیہ اطلاعات پر کی گئی جس میں فائرنگ کے تبادلے میں سکیورٹی فورسز نے 2 دہشت گردوں کو ہلاک کیا گیا ۔
تیسری کارروائی ضلع مہمند کے علاقے مامد گٹ میں ہوئی ، جہاں شدید فائرنگ کے تبادلے کے بعد مزید 2 دہشت گرد ہلاک کر دیے گئے، ہلاک ہونے والے دہشت گردوں کے قبضے سے اسلحہ اور گولہ بارود بھی برآمد ہوا ۔
آئی ایس پی آر نے مزید کہا ہے کہ ہلاک دہشت گرد سکیورٹی فورسز اور معصوم شہریوں کے خلاف متعدد دہشت گردانہ کارروائیوں میں ملوث تھے ۔
علاقے میں مزید کسی بھی دہشت گرد کی موجودگی کو یقینی طور پر ختم کرنے کے لیے سرچ اور کلیئرنس آپریشن جاری ہے، پاک فوج ملک سے دہشت گردی کے خاتمے کے عزم پر قائم ہے ۔
