اسلام آباد: قائم مقام صدر سید یوسف رضا گیلانی نے شمالی وزیرستان میں پاک افغان سرحد پر فتنہ الخوارج کی دراندازی کی کوشش ناکام بنانے پر سکیورٹی فورسز کو خراجِ تحسین پیش کیا ہے۔
قائم مقام صدر نے کارروائی کے دوران فتنہ الخوارج کے 15 دہشت گردوں کو جہنم واصل کرنے پر سکیورٹی فورسز کی پیشہ ورانہ مہارت اور دلیری کی بھرپور حوصلہ افزائی کی۔
سید یوسف رضا گیلانی نے کہا کہ بھارتی حمایت یافتہ دہشت گردوں کو وطن عزیز کے امن، استحکام اور عوام کی خوشحالی کے سفر میں رکاوٹ ڈالنے کی ہرگز اجازت نہیں دی جائے گی۔
قائم مقام صدر نے کہا کہ دہشت گردی کے مکمل خاتمے تک سکیورٹی فورسز اور قانون نافذ کرنے والے اداروں کی کاوشیں جاری رہیں گی۔
سید یوسف رضا گیلانی نے وطن کے دفاع کے لیے سکیورٹی فورسز کی قربانیوں اور خدمات کو خراجِ تحسین پیش کیا۔
قائم مقام صدر نے کہا کہ پوری قوم دہشت گردی کے خلاف جنگ میں سکیورٹی اداروں کے ساتھ کھڑی ہے۔
