اسلام آباد: وفاقی وزیر داخلہ محسن نقوی نے میران شاہ میں بھارتی سپانسرڈ دہشت گردوں کے خلاف کامیاب آپریشن پر سکیورٹی فورسز کو خراجِ تحسین پیش کیا ہے۔
اپنے بیان میں وزیر داخلہ نے 21 خوارجی دہشت گردوں کی ہلاکت پر سکیورٹی فورسز کی پیشہ ورانہ صلاحیتوں اور جرات کو سراہتے ہوئے کہا کہ خوارجیوں کے ناپاک عزائم ناکام بنانے والے سکیورٹی فورسز کے بہادر سپوت قوم کا فخر ہیں۔
محسن نقوی نے کہا کہ قوم کی مکمل حمایت سے دہشت گردوں اور ان کے سہولت کاروں کا خاتمہ کیا جا رہا ہے اور ملک دشمن عناصر کے مذموم عزائم کبھی کامیاب نہیں ہونے دیے جائیں گے۔
انہوں نے کہا کہ پوری قوم کو سکیورٹی فورسز کے بہادر جوانوں پر ناز ہے، جو ملک کے امن و استحکام کے لیے بے مثال قربانیاں دے رہے ہیں۔
وزیر داخلہ نے اس عزم کا اعادہ کیا کہ دہشت گردی کے مکمل خاتمے تک یہ جدوجہد جاری رہے گی اور قوم سکیورٹی فورسز کے شانہ بشانہ کھڑی رہے گی۔
