بلوچستان کے ضلع مستونگ میں سیکیورٹی فورسز کے آپریشن میں بھارتی حمایت یافتہ 3 دہشتگرد ہلاک ہوگئے، دہشتگردوں کے ساتھ فائرنگ کے شدید تبادلے میں میجر زید سلیم اور سپاہی نظم حسین مادر وطن پر قربان ہوگئے ۔
پاک فوج کے شعبہ اطلاعتِ عامہ انٹر سروسز پبلک ریلیشنز کی جانب سے جاری بیان کے مطابق سیکیورٹی فورسز نے ضلع مستونگ میں بھارتی سرپرستی میں سرگرم دہشت گرد تنظیم فتنہ الہندستان کی موجودگی کی اطلاع پر انٹیلی جنس بیسڈ آپریشن کیا ۔
اس دوران سیکیورٹی فورسز نے دہشت گردوں کے ٹھکانے کو مؤثر طریقے سے نشانہ بنایا اور دوران آپریشن تین دہشت گردوں کو ہلاک کردیا ۔
تاہم فائرنگ کے شدید تبادلے میں مادرِ وطن کے بہادر سپوت میجر زید سلیم اول ( عمر 31 سال، سکنہ خوشاب) جو فرنٹ لائن سے اپنے دستے کی قیادت کر رہے تھے، دشمن کا بہادری سے مقابلہ کرتے ہوئے جام شہادت نوش کر گئے، ان کے ہمراہ سپاہی نظم حسین ( عمر 22 سال، سکنہ جہلم) بھی شہید ہو گئے ۔
آئی ایس پی آر کے مطابق علاقے میں ممکنہ دیگر بھارتی سرپرستی میں سرگرم دہشت گردوں کی موجودگی کے پیشِ نظر کلیئرنس اور سینیٹائزیشن آپریشن جاری ہے۔
آئی ایس پی آر کا کہنا ہے کہ پاک فوج ملک سے بھارتی سرپرست دہشتگردی کے مکمل خاتمے کے لیے پرعزم ہے، اور ہمارے بہادر سپوتوں کی یہ عظیم قربانیاں ہمارے اس عزم کو مزید مضبوط کرتی ہیں
