پی ٹی آئی کے لانگ مارچ کے لیے اسلام آباد میں سیکیورٹی انتظامات کے سلسلے میں حکومت کی جانب سے کروڑوں روپے کے یومیہ اخراجات کی تفصیلات سامنے آ گئی ہیں،سیکیورٹی کا مجموعی خرچ ایک ارب روپے سے زائد ظاہر کیا گیا ہے، جبکہ مارچ چار اکتوبر تک مؤخر ہونے کے باوجود اسلام آباد میں کنٹینرز اور اضافی پولیس نفری اب بھی موجود ہے ۔
اسلام آباد میں سیکیورٹی انتظامات کے لیے 1550 کنٹینرز لگائے گئے ہیں۔ فراہم کردہ معلومات کے مطابق ان کنٹینرز کا یومیہ کرایہ 4 کروڑ 65 لاکھ روپے ہے، جو کہ ایک ہفتے کا 32 کروڑ 55 لاکھ روپے بنتا ہے ۔
اسلام آباد پولیس نے سیکیورٹی انتظامات کے لیے 82 کروڑ روپے مانگے ہیں، جبکہ سیکیورٹی کا مجموعی خرچ ایک ارب روپے سے تجاوز کرنے کا امکان ظاہر کیا گیا ہے ۔
پنجاب سے 16 ہزار پولیس اہلکار طلب کیے گئے ہیں۔ پنجاب پولیس کے اہلکاروں کے کھانے کا روزانہ کا خرچ 96 لاکھ روپے ہے، جو کہ ایک ہفتے کا 6 کروڑ 72 لاکھ روپے بنتا ہے، جبکہ سندھ پولیس کے کھانے کا دو ہفتوں کا خرچ ایک کروڑ 68 لاکھ روپے ظاہر کیا گیا ہے ۔
سیکیورٹی انتظامات کے لیے 70 کوسٹرز اور 30 ڈبل کیبن گاڑیاں بھی کرائے پر لی گئی ہیں، 70 کوسٹرز کا روزانہ کا کرایہ 10 لاکھ 50 ہزار اور 30 ڈبل کیبن گاڑیوں کا روزانہ کا کرایہ 3 لاکھ روپے ہے ۔
