اسلام آباد اور راولپنڈی میں موسلادھار بارش کے باعث نشیبی علاقے زیرِ آب آگئے ہیں، جبکہ نالہ لئی میں پانی کی سطح مسلسل بلند ہو رہی ہے۔
ضلعی انتظامیہ کے مطابق کٹاریاں کے مقام پر نالہ لئی میں پانی کی سطح 20 فٹ تک پہنچ گئی، جبکہ گوالمنڈی پل کے مقام پر پانی کا بہاؤ 17 فٹ ریکارڈ کیا گیا ہے۔
نالہ لئی کے اطراف خطرے کے سائرن بجا دیے گئے ہیں۔ انتظامیہ نے نالے کے کناروں پر رہائش پذیر افراد کو فوری طور پر محفوظ مقامات پر منتقل ہونے اور علاقہ خالی کرنے کی ہدایت کی ہے۔
انتظامیہ کے مطابق ڈھوک کھبہ اور صادق آباد کے علاقوں میں بارش کا پانی گھروں میں داخل ہوگیا ہے، جس کے باعث شہریوں کو مشکلات کا سامنا ہے۔
بارش کے اعداد و شمار کے مطابق گولڑہ میں سب سے زیادہ 144 ملی میٹر بارش ریکارڈ کی گئی۔ بوکرہ میں 132، پیرودھائی میں 105 جبکہ گوالمنڈی میں 77 ملی میٹر بارش ہوئی۔
دوسری جانب محکمہ موسمیات کے مطابق گجرات، سیالکوٹ، جہلم، شکرگڑھ اور گردونواح میں بھی موسلادھار بارش ہوئی۔ شدید بارش کے باعث کئی علاقوں میں بجلی کے فیڈرز ٹرپ کر گئے، جس سے بجلی کی فراہمی معطل ہوگئی۔
انتظامیہ نے نالہ لئی کے اطراف رہنے والے شہریوں کو احتیاطی تدابیر اختیار کرنے اور کسی بھی ہنگامی صورتحال میں فوری طور پر محفوظ مقامات پر منتقل ہونے کی ہدایت کی ہے۔
